明末清初耶穌會思想文獻匯編 · 第五十四冊：無名氏《辟邪歸正》

辟邪歸正 辟邪歸正 目錄 辟邪歸正目錄 519 客話卷一 522 第一節 上帝存在 522 第二節 上帝全善 522 第三節 善惡自主 522 第四節 上帝生惡物之意 523 第五節 上帝唯一 523 第六節 上帝是萬物根源 524 第七節 上帝無終 525 第八節 上帝無形而可信 525 第九節 教之真假不在帝王 526 第十節 聖賢恭敬上帝 527 第十一節 儒生亦當從耶穌教 529 第十二節 不拜孔子 529 第十三節 不拜祖宗 530 第十四節 不立牌位 531 第十五節 燒紙無益 532 第十六節 不祭墳墓 534 講論祭墳墓嘅根源 534 客話卷二 536 第十七節 祭祖非孝 536 第十八節 不拜死人 536 第十九節 天堂地獄 537 第二十節 靈魂不滅 537 第二十一節 神人鬼之別 538 第二十二節 真神許魔鬼在世 538 第二十三節 賞惡罰惡之公義 539 第二十四節 上帝不遽罰惡人 540 第二十五節 貧富不可均 541 第二十六節 耶穌勝過聖賢 542 第二十七節 耶穌的犧牲救贖 543 第二十八節 信耶穌的憑據 543 第二十九節 領洗禮的意義 544 第三十節 女人亦入教 545 第三十一節 教中之誡 546 第三十二節 假信徒 546 第三十三節 耶穌教非外國的教 546 第三十四節 不可拜假神 547 第三十五節 大意論拜神嘅法 547 第三十六節 論異端 548 第三十七節 大意講論靠風水生禍 548 客話卷三 550 第三十八節 講論擇日與揀方向嘅假處 550 第三十九節 講論算嘅假 550 第四十節 講論看相嘅假處 551 第四十一節 講論占卦求籤測字嘅假法 551 第四十二節 講論菩薩滿下係假 552 第四十三節 講論帝王有封神嘅權 553 第四十四節 講論玉皇 553 第四十五節 講論老君或稱老聃 553 第四十六節 講論真武 554 第四十七節 講論文昌 554 第四十八節 講論關公 555 第四十九節 講論城隍 555 第五十節 講論土地 556 第五十一節 講論社稷 556 第五十二節 講論真君 556 第五十三節 講論宴公 557 第五十四節 講論天后 557 第五十五節 講論張天師 558 第五十六節 講論神仙 558 第五十七節 講論雙忠 559 第五十八節 講論三山 559 第五十九節 講論佛 559 第六十節 講論輪迴嘅假 560 第六十一節 講論觀音嘅假 561 第六十二節 講論閻王嘅假 561 第六十三節 講論雜神 561 第六十四節 講論乜嘅緣故聖會唔准人娶妾 562 第六十五節 講論傳人做乜嘅離開屋家唔服事亞爸亞呢 562 第六十六節 講論一隻人唔好話進教係極難嘅事 563 第六十七節 講論世間人雖然行善也唔可以得天堂嘅真福 564 第六十八節 講論入教唔可以延遲 564 客話卷一 第一節 上帝存在 客問：汝等入教嘅人，誠心服事上帝，請問上帝兩隻字係樣邊解呢？ 答話：上帝兩隻字，唔係天，唔係地，唔係理，唔係道，唔係氣，唔係性，唔係人，唔係物件，也唔係鬼神，係造天地與人、又造萬物嘅大主宰，係天下萬人嘅天亞爸，係萬王個王。冇起頭，冇結尾，無所不能，無所不知，又極慈善至尊貴嘅，冇有可以與佢比得，如同天地萬物嘅頭腦，國家有君王，屋家有家長，又像完身有頭，孻子有亞爸，樹木有根，水有源頭。若係國家冇君王其國中就噲亂；屋家冇家長，其屋家就噲冇人料理；完身係冇頭顱，就唔生活得；水係冇源頭，就冇長流；故所以冇上帝，就冇天地人類。萬物囉咁樣看起來，詳細來查察下子，一看倒有天有地，又有人類與各樣物件，就必定有造天地萬物嘅頭腦，即係上帝，唔使思疑囉。 第二節 上帝全善 客問：上帝樣邊話得佢係無所不知、無所不能、又全備慈善嘅呢？ 答話：上帝從冇中造倒天地萬物，唔用材料，唔使心力，唔使揀日子時辰，喊佢有就有，喊佢成就成就，喊佢生就生，喊佢死，即時就死，故所以佢係無所不能。上帝唔單止曉造天地萬物，兼且知天地萬物嘅性情來安排佢，使倒各樣都有所在來保存天下萬人。或者善，或者惡，各人心肝藏緊嘅念頭滿下都明白。有賞有罰，故所以佢係無所不知。上帝做萬樣全完嘅頭腦，萬樣到好嘅根原，冇一的缺乏，天地間至好嘅。滿下在上帝噔來，故所以話得係全善。 第三節 善惡自主 客問：真神上帝，既然全備盡善，樣邊講世界上，還有噁心嘅人呢？ 答話：真神上帝，畀倒人嘅靈性，本來係全備盡善。好比中國四子書，孟夫子都有講，人嘅性情，本來係極善，如同水嘅性情，由上流到下；人冇有唔善，水冇有唔流下。就係因為上帝畀倒有隻自主嘅心，學習善就善，學惡就惡。又中國《三字經》書中都有寫倒話：「人之初，性本善」，意思即係話。人自始初出世當時，性情本來係全善。故所以人嘅性情，或者是，或者非，或者善，或者惡，自家嘅心，必定明白。有隻自主嘅心，若係人冇自主嘅權，樣邊曉行慈善，積功勞，必定與該等飛禽走獸冇乜嘅分別。兼且人行為作惡，滿下由自家心裡主張，唔係真神上帝使倒佢行惡。好比亞爸亞，養倒子女，滿下也望佢做全備盡善嘅人，但係其中還有唔守法律嘅子女，唔聽教導又還唔孝順。咁樣看起來，係亞爸亞嘅意思唔呢？ 第四節 上帝生惡物之意 客問：真神上帝，係全備盡善，生倒萬物來養人。樣邊講，又生倒等極惡嘅野獸、毒蛇、蟲豸、來害人呢？ 答曰：這等極惡嘅野獸，與毒蛇蟲豸，雖然佢噲害人，但係也可以有益畀人，不過吾等嘅智慧見識，十分淺薄，唔知其益處來用唔止。汝等愛查察下子，這世界上有好多人，將該等虎骨與熊膽，用佢來做藥，又用蜈蚣蟲與蠍子來醫病。可見真神上帝，所造各樣生物係想表明白，佢係無所不能，將各樣至好嘅生物滿在這天下。好比有光有暗，就成得日晨頭與晚晨頭。設使有光冇暗，樣邊分得出晝夜呢？有白冇烏，樣邊分得出彩色呢？有甜冇苦，又樣邊分得出五味呢？故所以各樣物件之中，唔論大小好醜，滿下也係有益畀唔等。有善獸可以幫助吾等，修心積德來受上帝嘅賞；有惡獸可以責備吾等嘅罪，怕受上帝嘅謫罰。可知人就愛查察其嘅理由，唔好怨恨上帝，生倒惡獸來害人囉。 第五節 上帝唯一 客問：上帝既然係至尊貴，又冇有可以與佢比得，可見上帝係一位。但係天地咁闊大，又有萬樣物件，竟係一位大主宰，樣邊料理得咁多呢？ 答話：天地萬物獨係有一位主宰，如同國家獨係有一隻君王。屋家竟係有一隻家長，完身又單係有一隻頭顱。若使一國有兩隻君王，其國就噲亂；一家有兩隻家長，其家必定噲分；一身有兩隻頭顱，就噲變做怪物。中國四書，孟子都有講：「天無二日，民無二王。」意思即係話天上冇兩隻日頭，子民冇兩隻王帝。咁樣看起來，就知天地獨有一位至尊貴嘅主，唔可以有兩隻主？若使有兩隻主，必定噲互相爭奪。汝等愛看天上嘅日頭、月光與各樣嘅星宿，每日每夜照次序來行動，自古時到今日，千古萬年以來，冇一的差錯。又看地下該等草與樹木，四季輪流來生，春天當時就生葉，夏天當時就開花，秋天當時就結果，冬天當時就凋謝，冇的紊亂。可見天地間獨係有一位主宰，就可以料理全完囉。 第六節 上帝是萬物根源 客問：天地萬物，滿下也係真神上帝造倒，又知天地萬物，獨係有一隻主料理。但係真神上帝，佢自家在那裡生下來呢？ 答話：真神上帝，做萬有嘅根源，做萬物嘅起頭。但係佢自家，就冇起頭。若使另外有一隻來生倒真神，！就唔話得佢係真神上帝囉。人若係愛問佢生嘅，係那儕生，由咁樣算竟去，樣邊有盡頭呢？故所以萬物嘅起頭，萬有嘅根源，即係上帝。除開上帝以外，唔可以再有生上帝嘅人。好比算數噔，萬就從千來，千由百來，百在十里來，十又係從一起頭。除開一以外再唔可以有一。設使又有一，加落一去添，就成做二囉。所以一做數目嘅起頭，做萬千百十嘅根源，又樣邊使問一，在那裡來呢？又好比該等樹木，其葉花蕊，完盡在枝杇生出來，枝杇由樹身生起來，樹身從根發生來，可知根係樹身、枝葉、花蕊嘅原頭。又做乜嘅愛問根在那裡生出來呢？誰不知世間嘅人類，與該等鳥雀野獸，也都係咁樣。現今嘅人，必定由亞爸亞所生，亞爸亞也係從亞公亞婆出下，係咁樣，一代還一代算竟去，到起初造天地當時，就必定有一男一女，在眾人嘅先，做萬民嘅始祖，再冇別人在始祖嘅先。但係始祖從那儕生，就係真神上帝造倒嘅。故所以稱佢係真神，做天地萬物嘅頭，也係吾等世人嘅天亞爸，人好唔奉事敬拜時。 第七節 上帝無終 客問：真神既然係冇起頭，係做萬物嘅起頭，吾又請問下，樣邊講話佢係冇結尾呢？ 答話：大概有起頭嘅，必定有結尾。如同人嘅肉身，與飛禽走獸，這等滿下也有起頭，有結尾。但係真神，係冇形樣，既然冇起頭，樣邊還有結尾呢？但係稱佢無所不知、無所不能、無所不在，永遠生活嘅真神就係囉。 第八節 上帝無形而可信 客問：真神上帝，既然係有，請問下有那儕看得倒呢？ 答話：愛知吾等所敬拜嘅神，就在四書五經所稱該位上帝囉。真神係冇形冇樣，好比《詩經?大雅》篇，也有寫倒話：「上天之載，無聲無臭。」「其意思係講上帝在天，係冇聲冇氣。又四書《中庸》篇，有寫倒話：「視之而弗見，聽之而弗聞。是故君子戒慎乎其所不睹，恐懼乎其所不聞。」其意思即係話，想看佢，又看唔倒；想聽其聲，又聽唔倒。故所以成做君子嘅人，佢行為作事，雖然人看唔倒，其心也時常謹慎，狂人看倒。其嘅心思說話，雖然人聽唔倒，佢也小心，狂畀人聽倒。若係冇一位冇形冇樣嘅真神，這隻君子，佢所嘅係那儕呢？咁樣看起來，就知有一位真神主宰囉。又好比人噔，佢唔曾親眼見過其祖公，時佢敢話其先代冇祖公嗎？故所以明白嘅君子，查察其道理，就知有本有末。如同看倒一間屋，就知始初有木匠師傅造倒嘅；看倒有光，就知有日頭；看倒煙，就知有火；看倒國家有律法，就知有君王，看倒有天地人物，就知有上帝主宰，設使冇祖公，子孫從那裡來呢？冇木匠師傅，屋宅樣邊得成就呢？冇火必定冇煙，冇日頭必定冇光，冇君王，國家也冇律法，冇只全能嘅真神，從樣邊來造化天地人物呢？若係愛親見嘅正信，唔曾親眼看倒就唔信，這係至愚蠢嘅人。明白嘅君子人，就唔係咁樣，佢獨係照理來查察，有理就信，冇理就唔信。譬如古時，有堯舜兩隻皇，帝今下嘅人，那儕可以親眼看得倒？單係用《鋼鑒》做憑據，用理來查察，必定信有這兩隻皇帝。設使有唔信，人時唔噲話佢係愚蠢嗎？今下吾講有一位上帝，管理天地人物，明白嘅人，就用《聖經》做憑據，又用理來查察下子，就信佢有，若使咁樣都唔信，時唔係至愚蠢嘅人嗎？ 第九節 教之真假不在帝王 客問：聖教既然係真教，至正嘅道。做乜嘅，該等做帝王嘅人又唔崇拜。若係在上嘅人係咁樣行為，在下嘅就噲學樣，這係照常嘅規矩。王帝既然進入聖教，其子民滿下也噲進教囉。 答話：至緊要，愛知教嘅真假，唔係在乎做上儕有咁樣行為，在下嘅人就愛學樣，唔可以將這等做憑據。獨係愛分出道理，或者真，或者假。若係道理真實，其教就為正；設使道理虛假，其就係邪教。因為一隻人，想學人嘅表樣，係看倒其真實盡善，然後正從；該等虛假嘅，時可以從佢嗎？好比孔夫子都有話，三隻人共下行，必定有隻我先生。堪當畀吾來學樣，吾就愛揀倒善嘅正從；或者惡嘅，吾就愛閃避佢。又同自家亞亞爸噔，也有善惡可以分別。若係父母良善，做子女儕應當愛學其良善；倘使父母兇惡，做子女儕還學其表樣唔呢？中國《鋼鑒》古書也有寫倒，堯、舜、禹、湯、文、武，滿下做帝王；桀紂幽厲，也滿下做帝王。但係堯、舜、禹、湯、文、武所講嘅說話、所做嘅事，滿下係善。佢在世間，也知用只壯健堅固嘅心，來表明白佢服事上帝，斷唔曾敬拜釋迦牟尼佛、太上老君，與各樣邪神菩薩。這咁好嘅帝王，做在下子民儕應當效法其樣。譬如桀紂所講嘅說話、所做嘅事，滿下殘害子民。這咁唔好嘅帝王，做子民，時可以學其樣嗎？凡教或者從或者唔從，唔在乎帝王敬拜與唔敬拜。設使以帝王所敬拜，正從；帝王唔敬拜嘅，就隔絕佢。係咁樣，就冇一教可以從得，各樣教也可以隔絕佢。因為查考《鋼鑒》所載，各樣教門，也有帝王與官府出告示，喊人愛遵從佢；也有出告示，禁止人遵從佢。好比秦朝，有隻始皇極惱儒教，將儒教該等書完下燒就；將儒教該等讀書人，殺死埋開佢。又前漢後漢當時，該等帝王，好多迷惑釋教也，唔准子民讀儒教嘅書。唐朝當時，迷惑道教，棄絕儒教，凡習儒教嘅人，多有受難來死。宋朝徽宗皇帝，迷惑道教，又隔絕釋教。元世祖遵從釋教，也禁道教，燒開道教嘅書。又文王當時，有隻魏崔浩勸北朝魏王盡殺天下沙門各佛像。雖然有迷惑道教與釋教嘅人，但係也有遵從真道，出命令喊人愛傳嘅。查考《西安景教碑》所記，唐朝時貞觀十二年，宣傳命令，滿世間愛遵行真道，各州府縣准子民建築教堂。又明朝，萬曆初初嘅時，有一隻宰相，崇信真道，係上海縣人，姓徐其名安做光啟，查考天道溯原就知。也有清朝康熙君，在北京，題只匾額，畀基督教咁樣寫倒：「萬有真原。」又有對聯寫倒咁樣話：無始無終，先作形聲真主宰。宣仁宣義，聿昭拯濟大權衡。至到道光二十五年，細查天下各教，正知這基督教，真實全善，與別樣異端邪教大不相同。准中外人民傳教習練，唔准禁止，又准各處設立教堂，勸人行善，確實有好大益處畀子民囉。 第十節 聖賢恭敬上帝 客問：四書五經，所稱讚該等聖人與賢人，至廣究嘅。就係堯、舜、禹、湯、文、武、周公、孔、孟、顏、曾、游、夏這等聖賢人，在世當時，佢唔曾講有真主，也唔曾講有真神兩隻字。做乜嘅汝等唔遵聖賢嘅說話，又造出真神兩隻字，來敬拜佢呢？ 答話：吾在先，既然講明白，愛知吾等所敬拜嘅真神，即係四書五經內所稱嘅上帝。真神兩隻字，與上帝兩隻字聲音雖然唔同，其嘅意思有乜嘅分別。真神嘅意思因謂世間有好多假神，故所以加一隻真字來分別。上帝嘅意思，因各國嘅王也稱帝，故所以加一隻上字來尊敬佢。好比《詩經?大雅》篇有寫倒話：「殷之未喪師，克配上帝。」意思係話殷朝唔失得天下，因佢有德行來待子民，就得倒上帝來矜恤佢。朱子佢也解明白，上帝係天地嘅主宰。又《詩經?小雅》篇有寫倒話：「有皇上帝，伊誰雲憎。」意思係話，係至大嘅上帝，佢冇私心來憎惱人。程子也話，天係屬形體，主宰天嘅就係上帝。既然朱子、程子兩隻人所講解真神兩隻字，聲音雖然有分呷，但係其意思就相同，係咁樣，就知吾等敬拜嘅真神即上古聖賢人所敬嘅上帝。但係世間該等人，閗多喊上帝嘅名，犯倒真神第三誡，其罪就好大。有等稱玉皇做上帝嘅，有等稱真武做上帝嘅，又有等稱太上老君做上帝嘅，也有稱協天做上帝嘅，故所以吾等就稱真神上帝來分別，唔與邪神來紊亂。真係可惜，現下該等人，少所見，多所怪，唔查究根本，閗多稱有生有死嘅人做上帝。誰不知該只老君，生在周朝，玉皇生在漢朝尾，協天生在後漢，真武乃明朝所對，樣邊稱得做天地嘅主宰呢？佢等唔曾出世當時，先有天地萬物，可見佢等係生在有天地嘅後，樣邊還稱得做天地萬物嘅主呢？查考四書五經內，只見堯、舜、禹、湯、文、武、周公、孔、孟恭敬服事上帝真主，唔曾聽佢敬拜老君、玉皇與各樣邪神，好比書經《湯誓》篇有寫倒話：「夏氏有罪，予畏上帝，不敢不正。」意思係話，夏桀無道德，殘害子民，其罪該當謫罰；湯王敬畏上帝嘅命，唔敢唔去，改除夏桀嘅罪。又曰：「予小子履，敢用玄牡，敢昭告於皇皇后帝。」其意思話，履係屬小子，樣邊敢用黑朱禮來改變，故所以吾敢膽表白我心畀上帝。又曰：「惟皇上帝，降衷於下民。」意思係話，獨有至大嘅上帝，用只分道心，畀吾等子民，有的橫歪嘅，武王曰：「既獲仁人，敢氏承上帝，以遏亂略？」意思咁樣講，武王話，既然得倒仁人君子，佢就敬奉上帝嘅命，來平靜當時嘅亂事。又周公曰：「上帝引逸。」其意思係話，上帝畀倒安樂，夏桀來享；佢翻下轉，用只噁心來待子民，上帝就棄絕佢。又曰：「維時不保，降者茲大喪。」意思係話，有成時子，上帝唔保護來講，就畀好大災難吾等當。又《詩經?大雅》篇有咁樣寫倒：「維此文王，小心翼翼，昭事上帝。」意思係話，文王用只恭敬嘅心，來表明佢服事上帝。又曰：「上帝臨汝，無貳爾心。」意思係話，上帝與吾等共在，唔好訥佢有偏心。又曰：「文王陟降，在帝左右。」意思係話，文王佢或者升高或者打低，佢也在上帝嘅左右。又曰：「皇矣上帝，臨下有赫，監觀四方。」意思即係話，至大嘅上帝，其聖名在這世間好廣究，時常監察天下萬民。又曰：「蕩蕩上帝，下民之辟。」意思即係話，至大嘅上帝，係萬民嘅君王。《周頌》曰：「無競維烈，不顯成康，上帝是皇。意思係話，成王、康王兩隻人嘅德行，冇人可以與佢比得，獨係上帝就大過佢。」又曰：「於皇來牟，將受厥明，明昭上帝。」其意思即係話，春天尾當時，上帝所賜嘅麥；既然成熟，吾等愛體貼上帝苦心，來多謝佢。《商頌》曰：「聖敬日躋，昭假遲遲，上帝是氏。」意思係話，湯王得上帝畀生命，既然好久，故所以佢愛敬畏上帝。孔子曰：「郊社之禮，所以事上帝也。」意思係話，郊禮係祭天，社禮係祭地，故所以郊社嘅禮即係敬拜上帝嘅禮。孟子曰：「雖有惡人，齋戒沐浴則可以禮上帝。」意思係話，孟夫子咁樣講，雖然有極醜陋嘅惡人，佢曉潔淨其心，也可以服事上帝。明道先生有咁樣話，天下嘅賢人，滿下係上帝嘅臣子。夏商周三代嘅書內，所稱上帝嘅名十分多，好難完盡寫出來，今下大略講幾隻，來做憑據。可見早時該等王帝，與該等聖賢人，所敬拜倚賴嘅，獨係真神上帝，也都證得出吾等入教人，恭敬服事上帝，就合早時帝王聖賢嘅教導囉。汝待棄絕上帝，翻下轉拜菩薩，就係背逆古聖賢嘅道理，時唔係使人可惜佢嗎？ 第十一節 儒生亦當從耶穌教 客問：照咁樣談論，可知耶穌，實在係正教。但係孔子嘅儒教，也可以稱做正教，做乜嘅從儒教都唔夠，又還愛從耶穌教呢？ 答話：愛明那樣唔夠，至緊要，先行查考道理。好比儒教該只儒字，其意思，係稱讀書人嘅名詞，話佢極好學，明白古時與今下嘅事，分別那等係邪，那等係正。查考夏商周該等讀書人，獨係服事上帝真主，唔拜邪神，咁樣就話得真儒教，現今從儒教嘅讀書人。其喙讀聖賢說話，但係唔照聖賢嘅道理來行，閗多去從該等邪教，好打酒醉，貪心又行姦淫，冇開自家良心。或者拜如來佛，或者拜太上老君，想咁樣來得福；或者拜文昌來求名，唔分別真假，唔查考虛實，如同濁水與清水共下流噔。又燒衣化寶，打齋做醮，與食醉酒在夢床，唔知人事噔。係咁樣嘅人，稱做儒教，實在好羞恥。吾等入教嘅人，就唔係咁樣，獨係愛謹慎其說話，小心其行為，聽從耶穌遺下嘅教訓，同心服事真主，守上帝誡命，閃避異端，遠隔邪教，棄絕淫行，去假歸真，獨獨行正道，就係耶穌嘅真門生。又四書論語篇，都有寫倒話，四海之內，皆為兄弟。意思係講，生在天下間嘅人類，滿下也係兄弟，愛相親相愛，和和氣氣，如同一家噔，有過失，就愛勸戒，有善事，就愛勉勵來行。互相忍耐，互相仁愛，在生同拜一隻神，同倚賴一隻主，等到來世，靈魂得救，享天堂冇窮盡嘅福。咁樣看起來，時好唔入耶穌教嗎？ 第十二節 不拜孔子 客問：汝等入教人，知係真儒教，又讀孔夫子書，樣邊講唔拜孔夫子，係乜嘅緣故呢？ 答話：孔夫子所講嘅等說話，來教後世人，獨係勸人，小心恭恭敬敬，表明自家嘅心，服事上帝，佢也唔曾講教人愛敬拜佢自家。好比有話，郊社嘅禮係敬拜上帝嘅禮，也唔曾講用郊社嘅禮來拜孔子；又話「獲罪於天，無所禱也。」其意思即係話，得罪上帝，冇那裡好祈求禱告囉。明道先生也有話，天下嘅賢人，滿下係上帝臣子，可見孔也係上帝嘅臣。兼且孔子又話，「天生德於予。」意思係話，其嘅生命德性，係上帝畀倒。可知使孔子生在世間，係上帝主意。既然係上帝主意，做乜嘅還使拜孔子呢？又俗話，儕儕都有講，孔子係萬民嘅先生，應當愛敬拜。吾回答話，孔子也有先生，四書論語有咁樣寫倒：「我非生而知之者，好古敏而求之者也。」其意思即係話，吾唔係出開世乜嘅都曉，係勤力好學正知嘅。又三字經有寫倒，「昔仲尼，師項槖。」其意思係話，孔子佢尊敬項槖，來做其先生。若係孔子愛敬拜，也應該愛拜孔子嘅先生正著。係咁樣跟尋來拜，跟到至先行起頭該只係那儕呢？即係真神上帝。又係天下各國萬民嘅天父，天下萬民嘅生囉，所以吾等入教嘅人，敬拜上帝，實係遵孔子嘅教導。汝等唔拜上帝，翻下轉拜孔子，唔單止得罪上帝，兼且還得罪孔子添。 第十三節 不拜祖宗 客問：照咁樣辨明白來講，可知真神係天地人物嘅大主宰，應當愛敬拜。但係吾嘅祖宗，係生身嘅大父母，也唔好忘記。好比曾子都有講，「慎終追遠，民德歸厚矣。」汝等入教嘅人，唔拜祖宗，係乜嘅緣故呢？ 答話：汝想明白乜嘅緣故，先行愛解明白祖宗兩隻字。祖者本也，宗者根也。人類嘅根本，就係祖宗，生自家完身，係肉身嘅亞爸，亞爸完身，係亞公所生，亞公嘅完身，係太公出下，由咁樣來推算，算到初開天地，該只始祖止，就係生吾等始祖公該位上帝囉。因為上帝係人類嘅根本，係祖宗嘅祖宗，所以敬上帝，如同拜祖宗一樣。若使唔敬拜上帝，就係丟棄祖宗。好比樹冇根，就唔曉生枝葉；水冇源頭，就唔曉長流；人類冇始祖，今下該等人，在那裡生下來呢？汝等拜祖公，照家中刻倒嘅神主牌，不過係二三十代，照祠堂所刻倒嘅，也不過係百零代止，在百代以前，時有老祖公所生嗎，設使冇老祖公，爾屋家該等祖公，從那裡來呢？若係既然有老祖公，做乜嘅獨係拜新祖公，唔拜該只老祖公呢？咁樣看起來，係與貪新忘舊噔。詳細來講，新從老該里來，老又係在新該里結末。新祖當拜，老祖公更過愛拜，因為佢係祖宗嘅祖宗，時唔知孔子有話，「物有本未，事有終始。知所先後，則近道矣。」意思係講，凡物件有根本，有結末；凡事有起頭，有結尾。知其或者在先，或者在後，就近道理囉，今下汝等敬拜祖宗，不過係拜其結末，唔曾拜其根本。拜其結尾，唔曾拜其起頭，話得係離開道理好遠囉。今下吾又講，慎終追遠嘅道理汝聽下子。慎終兩隻字該意思，即係話父母臨死該當時，做子女儕應該儘自家嘅本分，時常在父母該左右，盡心盡力來服事佢，幫助佢，安慰佢，使佢安樂來去世。死後又愛盡本分，預備便衣裳棺材，來埋葬其屍骸，這咁多樣，就係慎終兩隻字嘅意義囉。追遠兩隻字其該意義，又還講下添，即係追念祖公父母嘅恩情，唔好忘記，又愛守緊遺囑教人該等好說話，唔好忽略，這就係追遠嘅意思囉。但係汝等獨係拜幾代嘅祖公，唔可以話得係追遠，不過係追近止。若想追遠，應當愛追到人類嘅根本，正可以話得係追遠。這裡所講根本，係樣邊意思，即係話上帝。所以吾時常有講過，係敬拜上帝嘅人，佢有祖宗；唔敬拜上帝嘅人，就冇祖宗。又汝等拜祖公所用嘅禮物，不過將酒飯魚肉擺緊在神主牌嘅面前，或者燒等紙錢，或者燒等紙寶，或者燒等香燭，就係話用咁樣禮物，來表自家孝心。照吾看，實係至愚蠢嘅，樣邊講呢？看汝擺所有嘅酒肉茶飯，久必定色變味臭，唔曾看倒祖公來食。既然冇來食，擺緊又有乜嘅益呢，好比祖公係想飲食，樣邊講獨係拜新祖公，唔拜老祖公，時老祖公唔噲餓死嗎？ 第十四節 不立牌位 客問：汝等唔做神主牌，樣邊話得係敬祖公呢？ 答話：敬祖公與唔敬祖公，唔在乎做神主牌。因為人照俗例設倒嘅，唔係真神著發嘅天道。查考早時人祭祖公，用孫子來做屍，設倒其衣裳，裝模作樣，就用各樣酒肉，來獻祭佢，敬拜該只生人如同敬祖公噔。但係在後有等人，就嫌棄咁樣形式唔好，因為亞爸拜孻子，亞哥拜老娣噔，好像人倫錯亂噔。因咁樣就改開佢，立過神主牌。可知人設倒嘅禮儀，可以隨時變換，唔同天道，唔可以更改。照咁樣來講，立生人做屍，係錯亂人倫，故所以愛改開佢。立神主牌來拜，就係褻瀆祖公，也唔可以從。這兩樣比較下，用孫子來做屍，還係祖公嘅血脈，咁樣來拜佢，都還可以講得。若使用幾寸木，係冇靈嘅物件，那裡都可以放得，咁樣來拜佢，又有乜嘅意思呢？又或者話，立神主牌，係記先人幾時出世，乜嘅時途去世，使倒唔可以忘記。殊不知先人出世日了，與死該時期，可以寫在族譜，唔可以寫在神主牌。因為立神主牌，作為先靈在該里，這就係惹倒後代虛假嘅罪。或者又話，神主牌有喃巫先生，用銀硃筆點過主，就有先人三魂七魄在該里，若使安佢唔妥當，就話先人唔安，子孫必定唔好。設使祖先確實可以在神主牌住宿，樣邊講夏商周該等聖賢人，唔轉來責罰其子孫，做神主牌畀佢住呢？吾等入教嘅人，知善人嘅靈魂上天堂，與真神共下住；惡人嘅靈魂落地獄，與魔鬼共下住；滿下唔在世間，走落神主牌該里住，故所以唔立神主牌來褻瀆祖公囉。 第十五節 燒紙無益 客問：吾等燒紙銀寶，係表明做子女孝心。汝等入教人，做乜嘅唔燒紙錢銀寶來敬拜祖公，係樣邊解呢？ 答話：講論紙錢銀寶，滿下係誘惑害人嘅事。據汝等講，祖公在陰間，愛銀來使用，係咁樣，當畀真錢真銀佢用，做乜嘅用紙燒灰來騙佢呢？因為紙係竹料造成嘅，既然燒開就變灰，係至賤嘅物件，樣也變得成真錢銀呢？雖然燒就南山嘅竹，也唔可以使灰變成錢銀，咁樣看起來，樣邊還用得倒呢？設使爾祖公在生當時，汝將紙灰做真銀來畀佢，唔單止佢唔愛，翻下轉，噲罵汝像發顛一樣實在係唔孝順。可見生唔，可以騙，既然死開嘅人，時可以騙佢嗎？孔子有話，「事死如事生，事亡如事存。」意思係話，服事死人，愛與服事生人一樣，可知燒紙錢實在係冇損有益。查考《鋼鑒》古書，夏商周三代當時，唔曾有紙寫字，皆用絹布，或者用竹簡。既然冇紙，必定冇得燒，時可以話三代當時冇忠臣孝子嗎？又時可以話堯、舜、禹、湯、文、武、周公、孔、孟做唔孝嘅人嗎？孟子有話，「不孝嘅罪有五，惰其四肢，不顧父母之養，一不孝也。博奕好飲酒，不顧父母之養，二不孝也。好貨財，私妻子，不顧父母之養，三不孝也。縱耳目之欲，以為父母戮，四不孝也。好勇鬥狠，以危父母，五不孝也。」意思係話，懶惰耕田，唔做工，又唔尋生理做，游手好閒，唔養父母，這係第一件唔孝順。好賭博，好打酒醉，唔養父母，這係第二件唔孝順。貪心錢財好私慾，唔養父母，這係第三件唔孝順。放縱自家耳朵聽淫聲，放縱自家眼珠，來看淫色，惹倒父母羞辱，這係第四件唔孝順。好爭鬥打交，連累父母有危險，這係第五件唔孝順。照孟子所講，也唔曾話唔燒紙錢銀寶為唔孝順，獨係汝等唔從聖賢嘅說話，唔從先王嘅道理，任由自家意見，妄燒紙錢銀寶來騙父母，這就係唔孝順嘅人？愛知人類死後，靈魂滿下愛受上帝賞罰，若係在生行善，必定賞佢享天堂嘅福；在生行惡，當然罰佢受地獄嘅苦。故所以在天堂享福儕，佢也唔愛紙灰來用；在地獄受苦儕，畀紙灰佢也冇益。兼且人死後，唔嫁，唔娶，唔使飲食，也唔著衣裳，除開這幾件以外，錢銀有乜嘅用呢？人生在世間當時，有肉身嘅形體，必定用有形樣嘅物件，故所以愛買各樣器具與衣服，來保護其身體，愛買各樣食物來養其生命。人死之後，肉身歸土，靈魂係冇形冇樣，唔可以用有形有樣嘅物件。既然唔用各樣物件，汝畀錢銀佢，有乜嘅用呢？時常看汝等人，燒等紙錢，敬拜祖公，假名話，表明孝心，實係想求福，大約想保佑子孫昌盛、發財、有功名樣事。這等念頭，實在至愚蠢嘅，故所以冇奈何，愛解明白。佢殊不知，在生做人祖公儕，那儕唔想其子孫昌盛，那儕唔望子孫發財有功名。雖然有想望嘅心，但係冇幫助嘅力。逢著子孫有病，當危險嘅時，雖然至愚蠢，唔孝順嘅子女，都唔忍心看佢死，到底唔可以保其生命。咁樣看起來，眼曉看，喙噲講說話，手與腳可以行動做事，尚且冇本事保佑子孫生死；況且死後，肉身變土，樣邊可以保佑子孫昌盛、發財、有功名呢？時常俗語有話，「死生有命，富貴在天。」意思即係話，一隻人或生、或死，在乎上帝主意，或者發財、有功名，也係上帝安排。唔曾聽倒死生富貴，在乎燒紙錢祖公囉。又查考歷代古書，至有賢德嘅人，就係堯舜兩隻人，佢也唔可以保其子孫有賢德，來接其位，管理子民，因為堯帝孻子，其名安做丹朱，因佢十分唔孝順，行為作事，極唔合式，故所以其王位，讓畀舜帝來接其位。在後舜帝孻子，其名商均，又係極癟嘅人，故所以其位讓畀夏禹王來做。咁樣看堯舜兩隻人，古今稱佢做聖潔君王，佢都唔可以保其子孫，何況今下世間，該等庸夫俗子，死後樣邊可以保其子孫呢？可見燒紙錢銀寶，敬拜祖公，或者有益冇益，或者係有表明子女孝心冇，就可以明白囉。 第十六節 不祭墳墓 客問：孔夫子有咁樣話，獻祭愛用禮，可知禮唔可以廢開佢，做乜嘅唔祭墳墓呢， 答話：拜墳墓這件事，始初因為三月初三係清明節，就出門行嬲。在後嘅人，加多祭墳墓嘅事，唔係聖賢人注重佢。好比孔子，三歲當時，死開亞爸；到二十四歲，又死開亞。當時正知其爸該墳墓在防山，就抬其屍骸去該里埋葬，但係自其爸其死後，唔曾聽倒孔子拜墳墓。獨係有擺落水，沖崩防山墳墓，孔子就哀切來叫。咁樣話，吾聽倒古時該等人，唔修整墳墓，吾也想學其樣。咁樣看起來，孔子唔單止唔祭墳墓，該等墳墓佢也唔修整添，至到佢講獻祭愛用禮，不過係徒循虛假嘅禮。因為禮儀嘅形式，出乎人情，人情必定有偏，就唔係盡都合理。在後嘅人，唔遵服事生時嘅禮，獨獨藉口死後祭事嘅禮，至緊要愛知，實理就遵從，虛禮就愛改除。又魏文營壽陵，有詔命咁樣話，骸骨冇痛癢嘅知覺，墳墓係藏骸骨嘅所在，使倒存亡，冇事待慢，係指明祭墳墓係背禮嘅行為，但係今下該等人，照傳竟來嘅俗例，作為祭墳墓係孝敬，誰不知做人子女儕，服事父母，設使虛假，其罪十分大。用銅銀欺騙生人，尚且有罪，若使用紙錢元寶與各樣假物欺騙死人，自家問心，可以安唔呢，兼且紙，係蔡倫在後漢當時正造倒，元寶係宋武帝所稱嘅錢名，孔子在春秋當時，唔曾有用這等祭，更過明白，故所以做人子孫儕，應當在生時愛孝敬，設使父母死後，就愛因時候來掃墓，除淨該等草與樹仔，加等泥土去添，來記念佢。唔好做欺騙嘅事，就做得囉，時好照世俗規矩來做虛假事嗎？故所以吾等，父母在生當時，就孝敬服事，死開用禮埋葬佢，係遵古人實在嘅禮。 講論祭墳墓嘅根源 查考祭墳墓嘅事，始初見倒在周朝，在後秦漢兩朝，就好多人行咁嘅禮。周禮有話，祭墳墓為屍，又話成葬就祭墳墓，孔子有話，向墓來做祭壇。曾子又話，殺牛來祭墓，孟子有講，到東廓郊外地方來祭墳墓。又武王祭在畢國。這咁多隻人，滿下講祭墳墓先行嘅說話。至到秦興與西戎當時，該等人唔曉理義，就做倒寢廟，在墳墓側邊。因此漢朝，自高帝至宣帝，滿下在墳墓側邊做寢廟，每日來獻祭。蔡邕看倒祭墳墓咁盛行，佢就咁樣話：吾聽倒古時人，冇祭墳墓嘅禮。鄭樵又話；三代以前，冇祭墓。在後有好多忠心嘅官府，與明白嘅讀書人，有好多表章諫人唔好祭墓，愛除開祭墓嘅禮。可知祭墓，係唔合理。到唐開元二十年，以寒食節來祭墓，作為永久嘅禮儀。到宋朝就唔用寒食節，以清明節祭墓。自該當時到今下，以清明做祭墓嘅節。但係書傳所記，雖然係祭墓，愛知這樣禮，上古時代冇嘅。兼且成葬一祭，係迎精來轉，在後唔再祭墓，而祭在廟。後長嘅人，每年上墳墓獻祭，其係乜嘅道理呢？設使祖公嘅靈魂，如果在寢廟，或者可以來享獻祭，墳墓中獨獨存到有骸骨，樣邊曉來享爾獻祭呢？早時人既然錯在先行，後代人又接緊其錯處，傳畀後代；早時人既然背逆道理，在後更過背逆道理，這係大略嘅查考。 客話卷二 第十七節 祭祖非孝 客問：做人子孫儕，設倒春天與秋天，兩擺獻祭，來表明子孫嘅孝心，實在報本追遠嘅道理，時可以廢開佢嗎？ 答話：曾子時常教人咁樣話，「椎牛祭墓，不若雞豚逮存。」意思係話，死後殺牛來獻祭，唔當生前有雞肉畀佢食。實在父母死後，係冇知覺，父母在生當時，愛儘自家本分來孝順。但係今下該等人，父母在生當時，佢就薄待佢；父母死後，翻下轉就厚待佢，湯等豬羊來獻祭。吾等入教人，唔在乎咁樣來獻祭，做這等虛假嘅事。係愛父母在生當時，親身服事其完身，又愛安慰其心，更過愛將主嘅道理，來勸諫佢，來救其靈魂。設若父母死當時，儘自家力量，買衣裳棺材，尋地方來埋葬佢。唔使信風水與地理先生，也唔狂有凶神惡殺，唔論乜嘅時候，都可以掃墓，也可以隨時去修整墳墓。若使父母在生，有好行為，做子女儕，就愛照其好行為來做事，這就係武王周王盡孝順嘅本分。設使父母冇好行為，做子女儕，就唔學其樣，這係虞帝舜帝盡孝順嘅本分，想傳孝順嘅道理。畀後代，就愛自家先行盡孝順嘅本分，由宗族該等人，或親或疏或朋友，都愛謙卑遜讓，這就係儘自家嘅本分。時春秋二祭，設立神主牌，都可以話得孝心嗎？ 第十八節 不拜死人 客問：汝等入教人，唔設立神主牌，唔燒紙錢銀寶。照汝等講，實在有道理。但係父母死後，入開殮當時，做子女應當愛在側邊，來表明哀切嘅孝心，但係汝等入教嘅人，做乜嘅唔在側邊來拜死屍呢？ 答話：父母死後，靈魂離開肉身，就到上帝面前愛受審判，或者賞，或者罰。該等死屍，係冇知覺，拜佢有乜嘅益呢？雖然跪到爾膝頭腫開，佢也唔曉回答汝。若使爾父母在世當時，其靈魂在本身，佢係睡開，汝也必定唔拜佢。設使死後，靈魂離身，屍骸同木石噔，唔知唔覺，時好拜死屍嗎？ 第十九節 天堂地獄 客問：天堂地方，汝等信係萬福嘅所在，來賞善人。地獄該里，係萬禍嘅所在，來責罰惡人。但係四書五經中，唔曾有講明這等事，汝等因乜嘅來信佢呢？ 答話：現今世界，讀書該等人，唔詳細查考其文義，一開喙就話，唔曾講明天堂地獄。殊不知，《詩經?大雅》篇有寫倒咁樣話：「文王在上，於昭於天。」意思即係話，文王雖然死開，其靈魂也在天堂。又話：「文王陟降，在帝左右。」意思係話，文王或者升高，或者打底，也在上帝天堂左右。又話：「世有哲王，三後在天。」意思係話，太王、王季、文王，滿下在天堂。又《召誥》篇，有咁樣寫倒話：「天既遐終大邦殷之命，茲殷多先哲王在天。」意思係話，上帝既然遠絕殷朝嘅命，今下殷朝，好多哲王在天堂。所以古書講在上、在天、在帝左右、時唔係講天堂嗎？因上帝享受萬福嘅位，本來冇名可以稱得佢，故所以指天堂兩隻字稱佢，表明安樂嘅意思。可見古時該等賢人，滿下都知有天堂，畀善人做安樂嘅地方。咁樣看起來，有天堂，就有地獄，畀惡人來受苦嘅所在。因為有賞，必定有罰，係自然嘅理，古書內稱殷王文王，係有道嘅聖君；紂王桀王，係冇道嘅昏君。聖君在天堂，時昏君也在天堂嗎？必定在地獄，唔使思疑囉。在獄者，係惡人靈魂與魔鬼，同受上帝刑罰嘅所在。本來冇名好喊，故所以借地獄兩隻字，表明受罰嘅意思。 第二十節 靈魂不滅 客問：人死後，如同燈火吹烏，樣邊講，還有靈魂來受賞呢？ 答話：人與禽獸來分別，就係因為人有靈魂。這係真神上帝畀倒嘅，唔單止有知覺行動，兼且曉分別善惡。靈魂在完身，好比人在屋噔，若係靈魂離開，其完身必定噲壞，但係其靈魂，永久都在。設若講人死開，靈魂就滅，行善嘅人，有乜嘅益呢？行惡嘅人，有乜嘅害呢？係咁樣就唔當行惡更過好。早時顏回行善，佢好短命；盜跖行惡，其命好長。若使係冇靈魂，有那儕肯學顏回嘅樣呢？或者話，其名流芳百代。但係人死歸土，縱使得倒極好嘅名聲，也冇幫助生前嘅辛苦。兼且行善多受艱難，翻下轉行惡得倒快樂，死又冇報應，時縱人行惡嗎？故所以話，靈魂斷唔滅得，然後天網冇的疏漏。世人唔知靈魂嘅報應，故所以行善，就望報在肉身；又望報在子孫。但係唔應驗過多，所以阻隔其善心，佢就敢任意行惡，滿下都係唔顧靈魂嘅過失。 第二十一節 神人鬼之別 客問：世間人時常有講，人死就變鬼，鬼又可以變轉人來，唔知係真唔？ 答話：神、人、鬼三樣，世間人好多唔明白，就來紊亂佢。因為天差與魔鬼，滿下係冇形冇樣。上帝唔曾造人以先，先造天差來服役，愛聽上帝嘅命令，好比一國之中，該等朝臣一樣。其中有隻才能本事極廣究，其名就喊做撤但，佢自家倚恃其才能本事，就生出驕傲嘅心，合就一黨人，來忤逆上帝。在後上帝將這一黨驕傲天差，預備責罰落地獄，受永遠嘅苦，今下喊魔鬼該等就係囉。另外該待唔曾忤逆上帝，時常在上帝左右，永享天堂真福，今下稱佢天差該等就係囉。上帝自責罰魔鬼以後，正造人類，如同上帝自家嘅像一樣。男人名亞當，女人名夏娃，造成肉身，吹等生氣畀佢，又賜靈魂添，使佢在這世間，虔心服事上帝，修德行善，然後正准佢到天堂，享永久嘅福，即係今下稱人嘅靈魂就係囉。若使在世問背逆上帝，服事魔鬼，行兇作惡，死後必下地獄，與魔鬼同受永苦，唔可以再做人，這就係天差，人嘅靈魂，與魔鬼嘅來歷，唔好閗多來紊亂佢。 第二十二節 真神許魔鬼在世 客問：魔鬼既然係害人，真神做乜嘅唔禁佢落地獄。前時看倒行邪術嘅人，做等極出奇嘅事，唔係魔鬼幫助佢來講，人斷冇本事來做，可見魔鬼在世間乘機會來誘惑人，係咁樣做乜嘅唔禁止佢呢？ 答話：魔鬼受罰嘅日期唔曾到，故所以上帝准佢暫時在世間，又在空中遊行來試煉人。或者從邪從正，或者行善行惡，這係樣邊解呢？因為世間人，好多唔信鬼嘅，有時鬼藏人身，行出奇異嘅事。使人信鬼實在係有，尊佢敬佢，做其奴僕，任佢欺騙，既然知有鬼。必定知有神，故所以鬼可以使人尋究真神嘅來由，這係第一件。若係知天差逆命，變做邪鬼來受永遠嘅刑，使人類唔敢逆命犯罪，知善惡有報應，這係第二件。好比煉善人嘅德，與火煉金噔，越煉越真，俗語有話，「家貧見孝子，世亂識忠臣。」世界冇魔鬼誘惑，樣邊見得出崇善，這係第三件。好比兵與賊來交戰，打贏賊儕，應當得賞；若使與賊同黨，順服賊儕，應當責罰。魔鬼雖然想誘惑人犯罪，唔可以勉強人為惡，禍福係由人自家招倒。況且真神幫助人敵魔鬼，又特事畀福音真理，教導樣邊打贏魔鬼，故所以吾等，做上帝軍兵，在生一世，務要打贏魔鬼，制勝自己嘅私慾，復禮來行仁愛，直行天堂嘅路，時時警醒祈禱，免至畀佢誘惑，翻下轉，得得永生嘅福倒。 第二十三節 賞惡罰惡之公義 客問：真神既然係至公道、至仁義，有義必然賞，有惡必然罰。樣邊講，世間嘅人行善儕，一世都受苦；惡人一世都享福，係咁樣顛倒錯亂，真神嘅公義在那呢？ 答話：行善嘅人，必然受賞，行惡嘅人，必定受罰，這係一定嘅道理，唔使思疑。《書經》有講：「惠迪吉，從逆凶，惟影響。」意思係話，順善嘅人就吉，從逆嘅人就凶，好比影跟該只形樣噔，如同響連緊聲音一樣。又話，「天道福善禍淫，作善降祥，作惡降殃。」意思係話，上帝用至公義嘅心來待人，設使行善嘅人，必然得福，行惡嘅人，必定得禍，這就係賞善罰惡嘅理，永久唔可以改換。愛知真神賞罰，唔係在人生前，係在人死後，用其公義審判。若使人心思說話行為，全完合真神主意，又唔曾犯誡命，正可以話得係真善；設使有一的唔合，也唔算係真善。因為人說話行為，至緊要愛盡善，又冇一的缺乏。今下世上該等人，時有全善嘅人嗎？故所以好多事情，吾等作為善事，上帝翻下轉看為惡事，因吾等獨獨看人外貌，唔識得人嘅內心，但係上帝就知。好比今下世間該等人，雖然其罪惡極大，或者有些須小善，也就當有小報，看世上嘅榮華富貴，算唔得係真福，因為唔可以久享，雖然享到一百歲，一死就冇。上帝因暫時嘅小善來賞佢，死後用地獄嘅永苦，責罰惡人嘅重罪，時唔係真神嘅公義嗎？又今下世上嘅人，雖然至良善，也有些須小過，當愛受小小嘅責罰。當生前嘅災難貧窮，唔得係重責罰，雖然受責罰到一百年，一死就冇。上帝因暫時嘅小苦，責罰善人嘅小過，死後用天堂嘅永福，報善人嘅功德，時唔係真神嘅公義嗎？故所以惡人生前安樂，死後佢就受苦刑；善人生前貧窮，死後安樂享福。世間人唔明白賞罰嘅公義，唔知禍福嘅真假，閗多怨上帝唔公義。殊不知如同玉石噔，唔雕琢佢，唔成器皿。又好比人唔學，唔知理義。可見冇勞心，唔可修德；唔經過苦楚，唔可以成功。設使冇功冇德，想求天堂真福，像人唔學武藝，唔讀詩書，就想得功名，時咁樣可以求得倒嗎？如同吾等，既然做耶穌門生儕，在這世界上，傳揚主嘅道理，也好多擺受人咒罵，好多擺畀人拒逐，好多擺受人羞恥，好多擺畀人無辜受苦。獨獨時常忍耐，自細到老，都照主嘅道理來行，就可以得得天堂公義嘅報賞囉。 第二十四節 上帝不遽罰惡人 客問：惡人在世間，屢屢害善人，上帝既然係至公至義，做乜嘅唔滅開該等惡人，來代善人報讎呢？ 答話：上帝雖然係至公至義，又至仁至慈，賞罰就用公義，拯救就用仁慈。上帝有好生嘅德，通世界人物各樣，滿下上帝所生，這就係仁慈嘅用心。人類嘅靈魂有賞罰，這也係上帝公義嘅心。但係上帝用仁慈待人，雖然有惡人，也寬待可憐佢，即係想佢悔罪改過，使其靈魂得救。殊不知這等惡人，唔曉改過行善，雖然有真道來教導，佢也唔肯信從，至到死唔曉改，上帝用公義心責罰佢。設使責罰在生前，狂怕損害善人。樣邊講呢，因為好多做亞爸行惡，但係其孻子行善，若使滅開其爸，其孻子就噲成做孤子，冇好倚靠。又有等做孻子儕行惡，其爸就善良，若使滅開做孻子儕，其爸就噲冇人服事，來供養佢。也有好多做人丈夫儕行惡，但係其婦女良善，若使責罰滅開其丈夫，做婦女儕就成做寡婦，也十分可惜。好比掹稗，就噲損害禾苗；挑筋，就噲損害肉。故所以愛等禾苗與稗，同下生長，收谷入倉當時，將該等稗，正來燒開佢，可知上帝仁義兩全，咁樣看起來，人就愛快快醒悟，改惡行善，誠心服事上帝.倚靠救主，使自已靈魂得救就係囉。 第二十五節 貧富不可均 客問：上帝至公至義，做乜嘅唔將世上嘅財帛，均分畀世間人，使倒儕儕一樣，冇窮富嘅分別，時係咁樣唔好嗎？ 答話：上帝生人，有窮有富，正成世界。也使人修心行善，用窮富來報賞佢。若使佢當財主儕，其心仍然行惡，又驕傲人，欺騙善人，唔合道理嘅事，樣樣都去做，係咁樣來講，雖然佢財主，也噲變做窮人。若使佢係窮人，其心肝緊行善嘅念頭，說話行為，極合道理，又慳儉勤力，冇事懶惰，係咁樣來講，雖然佢係窮人，也噲變財主。俗語有咁樣講，富貴輪流轉，時有冇報應嗎？因為上帝畀肉身吾等，也有耳朵眼珠手腳，又有心思知覺，有謀生嘅智慧。世界上也分別好多樣人，或者讀書人，或者耕田，或者做工，或者做生理，各儕做各儕嘅職業，也還有各樣謀生嘅術藝，所爭人做唔做唔止。設使上帝生人滿下做財主佬，還有那儕去做工，有那儕去耕種。冇人做工，該等日用器具，從那裡來；冇人耕種，該等米谷在那裡來呢？係咁樣，冇器具用，冇人耕種，滿下人也噲變做禽獸囉。設使上帝生人□□滿下貧窮，想做工儕，冇那裡好做，也冇那裡好賒借，世界人滿下也好睏苦淒涼。故所以上帝生人有窮有富，使倒互相幫助。財主儕得窮人嘅力，貧窮儕得財主人嘅錢財，一儕勞心，一儕勞力，兩樣唔可以缺，時好均分財帛畀人嗎？況且上帝造人，如同瓦師傅造器具噔，有等粗，有等幼，有等大，有等小，各有各樣使用。係咁樣，時可以怨恨造倒唔同樣嗎？設使都有人怨恨，別儕就噲話佢冇見識。可見上帝造人，有窮有富，時可以怨恨上帝嗎？咁樣看起來，人生在世間，或者當順境，或者當逆境，或者貧窮，或者財主，滿下係上帝嘅主意。可知人愛聽上□帝命令來行，時時關心道理，唔好憂愁貧窮，係咁樣，可以入耶穌嘅教囉。 第二十六節 耶穌勝過聖賢 客問：耶穌係外國嘅聖賢嗎？中國嘅聖賢係一樣嗎？ 答話：耶穌兩隻字，即係救世嘅意。因為上帝賜獨生子，下世間救人，故所以安其名耶穌，比聖賢更過尊貴。查考其才能、教門、功德，就可以知得。先行將其才能來查考下。在《聖經》有寫倒：佢所行嘅靈跡，即係醫病、逐鬼、喊死人翻生樣事。耶穌一生，與真神嘅智慧見識一樣。講論聖賢人，雖然有出乎人類嘅知識，超脫人群嘅才能，到底都係做世上嘅人，其該智慧見識有限，還有好多緊要嘅道理，滿下唔明白，故所以賢唔可以與耶穌比得。又將教門來談論下。聖賢嘅教門，僅可教人修身、齊家、治國，三綱、五倫、五常、（修身嘅意思，即係潔己，或好或惡，時常愛小心行為。）（齊家嘅意思，即係行正倫常嘅道理，篤實恩愛仁義。）（治國嘅意思，即係自已行倒有德行模樣，立倒有道德標準，畀人學樣。）（三綱嘅意思，即係君臣、父子、夫婦因為君主儕，係做臣子嘅頭腦；做亞爸儕，係孻子嘅頭腦；做丈夫儕，係婦女人嘅頭腦。）（五倫嘅意思，即係父子有親、君臣有義、夫婦有別、長幼有序、朋友有信。）（五常嘅意思，即係仁、義、禮、智、信。）這咁多樣，不過係處己待人。與及眼前嘅事，唔曾講明服事真神；與來生嘅事，好比贖罪、復活、審判、永福、永禍，滿下唔曾有講，故所以唔得完全。因為聖賢所講嘅理，耶穌既然講明白；聖賢唔曾講嘅理，耶穌滿下也講明。係咁樣，聖賢唔可以與耶穌比得。又將功勞德行來比較下，講論聖賢嘅功勞德行，不過係將其道理，教本國嘅人，佢自己親身引帶人行善，唔可以用其自家嘅身，救人脫罪，使人成聖潔，來救人嘅靈魂。但係耶穌用其道理，教通天下嘅人，唔單止親身引人行道，更過犧牲其生命，贖人脫罪，使人靈魂得救；又行好多神跡異能，好比發出一句說話，使盲眼人看得倒、耳聾人聽得倒、啞嘅曉講說話，跛腳嘅噲行走、病儕即時平安、死嘅曉翻生、海浪也話得佢平靜。這等奇事，聖賢做唔來，耶穌屢屢係咁樣做。耶穌所行神跡，唔同他人行邪術，唔係在暗中來做，係在眾人面前來行；唔係用法術來做，係用神嘅大權能來行；也唔係為名為利，唔係想人來驚狂出奇，佢係想人知，佢實在係救世人。可見耶穌尊貴過萬國嘅聖賢嗎？ 第二十七節 耶穌的犧牲救贖 客問：耶穌既然係真神嘅孻子，做乜嘅被人釘死在十字架呢？ 答話：為贖人脫罪，古今人，滿下有罪，應當受真神責罰。有人想立其功勞來補其過失，就唔知惡多善少，正改開前日嘅罪愆，又有後日嘅過失。若使一世都盡本分，也無分外嘅餘功。好比欠人舊債，唔曾還，在後雖然有現銀交易，唔欠分毫，也唔話得唔欠人嘅債。或者話，人有罪赦就赦，唔赦就罰，做乜嘅使耶穌代人贖罪呢？噯喲！汝唔知真神係像人嘅君王，又如同人嘅亞爸噔，若使孻子有罪，即時就滅開佢，就失開做亞爸嘅恩情；子民犯罪，滿下赦免佢，就失開做君王嘅公義。故所以耶穌贖人脫罪，係恩義兩件全完。早時希臘國有隻君王，佢責罰其太子咁樣話，吾既然出里告示。犯我律法來行姦淫儕，就挖開其對眼珠，唔赦免其罪。今下汝既然犯倒這條律法，若使照正律法來定爾罪，吾又唔忍心；倘係徇情偏心來待汝，又樣邊來立法呢？汝自後如果悔罪改過，吾就自家挖一隻眼來待汝，又出命挖太子一隻眼珠添。太子感激其爸嘅恩愛，改過自新。到底佢也做君主，天亞爸待吾等，也係咁樣。可惜吾等怕唔曉學這隻太子嘅樣，曉悔罪改過。另外有好多忠心嘅臣人，殉國難來死，後人也仰慕佢，何況耶穌殉萬世萬國嘅難。兼且自古以來，各國嘅人，滿下用犧牲獻祭，表明贖罪嘅意思。或者咁樣話，犧牲係用佢來祀鬼神。殊不知湯王該時，有七年大旱天，佢就剪髮斷爪，用身做犧牲，時唔係代罪來求免人嘅災難嗎？可見湯王獨救一國人嘅災難，何況耶穌獻身做罪祭，完贖罪嘅事，釘死在十字架上，係咁樣，就係救萬世萬國嘅人，做贖人脫罪嘅祭囉。 第二十八節 信耶穌的憑據 客問：耶穌死開，在後三日翻生，這件事，唔知係實在唔？ 答話：舊約書離耶穌千幾年，或者幾百年，先知師由真神默示，加先講出救世主降生在那裡地方，係乜嘅人子孫，又講及佢在世被人害死，翻生上天，滿下應驗在耶穌身上，這係第一件信佢實在嘅。真神狂怕人唔明贖罪嘅理，使人歷代獻牛羊做贖罪祭嘅影，等到真贖罪嘅形樣，來這世間以後，耶穌獻其身做生活嘅祭，如同贖罪嘅羔羊噔，這係第二件信佢實在嘅。等到耶穌翻生上天，吩咐門徒傳揚翻生嘅證據，門生就被人打罵害迫，設使唔係親見確實，樣邊樣還有咁堅心來做證呢？這係第三件信佢係實在嘅。猶太人因嫉妒來殺耶穌，門徒時常證佢有釘死救主嘅罪，到今下其國子孫，滿天下都有，這係第四件信佢係實在嘅。新舊約兩本書，記好多鄰國交涉嘅事，今下查考鄰國嘅史記，滿下相同證據，這係第五件信佢係實在嘅。新舊約所記耶穌各樣事跡，今下多人往猶太國，查考古蹟，到今下還在，這係第六件信佢係實在嘅。西人蹤跡遍天下，凡各國一事一物，也都留心查考，若使耶穌道理唔係真實，樣邊講唔揀擇別教，獨係揀倒耶穌嘅教？這係第七件信佢係實在嘅。西國律法師，雖然極細微嘅事，佢也詳細查察新舊兩約聖書相隔千幾年，經過幾十人筆記，細查其書，滿下相同，這係第八件信佢係實在嘅。當時門徒僅可一百二十人，滿下係卑微嘅人，兼且遭好多害迫，唔係耶穌在天保護，樣邊傳揚到通天大下？這係第九件信佢係實在嘅，今日奉教嘅人，滿下尊重聖教，無一的可以嫌棄，還狂怕人力唔夠，唔曉堅心守穩，又教其子孫愛入聖教，這係第十件信佢實在嘅。泰西各國信耶穌之後，滿下日見日進步，可知其教化有能力。這咁多不過大略述出，還有好多事跡，載在新約書做憑據，人人可以共下信佢嘅。 第二十九節 領洗禮的意義 客問：信耶穌教道理就夠囉，樣邊講又愛領洗禮正可以入教呢？ 答話：罪人悔改，必定愛尊耶穌嘅命領洗禮，表明做耶穌嘅門徒。如同叛逆嘅子民噔，必定尊律法改裝，認做皇帝子民。故所以耶穌佢有話，信佢來領洗禮儕，就得救；唔信儕，將來定罪。受洗嘅意思，表明與耶穌同生同死，共下成做一會，非係結黨，唔係為名為利，竟係為自家嘅靈魂，廣傳耶穌嘅道理，耶穌吩咐人入教，其意思十分廣闊，不過大約來講下：一則加增人嘅知識。因為人像細子噔，無乜嘅見識，最容易受人誘惑，若使既然身入教會，就有牧師先生，用聖經來教導，加增爾智慧，就可以免脫誘惑。二則堅固人嘅信德。人雖然悔改信主，但係信心容易冷淡，身入教會，有牧師勸慰，有教友警醒，互相勉礪，如同人嘅完身噔，聯絡幫助，正可以堅固。三則立神國在地上。人唔曾除淨惡性，身雖然想升天心也唔安樂，必定先行在教會學習天理，守緊真神誡命，存緊聖潔嘅念頭，然後可以安享天福；又賜代主行權，接人入聖會。會內有唔照主嘅道來行，就愛革佢出聖會。愛使佢行所當行，做所當做，與世俗愛有分別，來做世間嘅光。四則合心力傳道。聖徒得救，又愛救人。但係一隻人才能智慧唔夠，幫助嘅力有恨。身入教會，就合眾人嘅力量，傳揚福音。故所以話信耶穌儕，必定愛領洗禮來入教囉。 第三十節 女人亦入教 客問：男人從教就可以夠做乜嘅，女人都愛來入教呢？ 答話：若係邪教唔論男女應當愛閃避；其係正教唔論男女必定愛從。既然知耶穌教係正教，男人可以從，獨獨女人唔可以從嗎？時上帝賜口糧，男人可以用佢來養生，女人就該當餓死嗎？兼且自古時以來，滿下都有死，設使人冇教育就與禽獸噔。女人也係人類，時獨獨女人唔使受教育嗎？吾等傳教嘅人，體貼上帝嘅公義，遵從耶穌嘅教訓，傳畀世間嘅男女。但係有等唔曾入教嘅人，唔知正教十分嚴重，還有等好色嘅人，翻下轉思疑男女混雜。殊不知我等教中人，滿下服事真神為根本，以救靈魂為緊要。教會一切教訓與十誡，滿下係救主所傳授嘅，盡善盡美，天理人情，至正道理，男女應當行嘅本分。況且淫邪係聖教十誡所嚴禁，教中嘅人，滿下愛遵守十誡，若有犯誡就即時革出聖會，死後落地獄，受永久責罰。世俗人冇知識，用行淫毀謗正教，殊不知教友各儕，營謀自家業藝，各儕轉各儕屋家住宿。不過公設一間，禮拜堂七日一擺聚集同心共拜真神，靜心聽牧師講道理，男女有分別，眾目共見，僅可聚集三四點鐘，就各儕轉屋家，係光明正大嘅舉動，那裡有淫邪嘅事呢？今下教外嘅人在戲園看戲，男女共下來坐，入廟堂燒香男女混雜，係咁樣都唔褻瀆，反下轉褻瀆正教。因有淫心嘅人，就疑狐人也有淫心。殊不知教士以神為重，以人為輕，心正去百邪，唔怕人褻瀆，唔避人嫌，想得真神歡喜，使道理有益畀人就係囉。 第三十一節 教中之誡 客問：入教人應當守乜嘅誡呢？ 答話：愛守上帝十條誡。第一誡，真神以外，唔好有別二樣嘅神。後二誡，唔好雕刻偶像，天上地下海中百物，也唔好拜。第三誡，唔好閗多褻瀆真神嘅名。第四誡，愛守安息日，當該日，唔好做各樣工夫。第五誡，愛孝敬父母。第六誡，唔好殺人。第七誡，唔好行姦淫。第八誡，唔好偷人嘅。第九誡，唔好講假話。第十誡，唔好貪人嘅物。另外領洗禮食聖餐，係耶穌立倒嘅，也應當守佢。 第三十二節 假信徒 客問：真神十誡，實在至善。但係看倒入教嘅人，守十誡好少，犯十誡較多，也有好多無所不為，比吾等教外嘅人，更過行惡。若使稱這等係聖教中人，天下人，滿下可以話得佢係聖潔囉。 答話：今下吾等不過論教嘅邪正、道嘅真假，唔係分論入教人善與唔善。因聖教嘅宗旨，係行仁愛，講理義，改惡從善。所講嘅說話，所行嘅事，愛端正合規矩。除開世俗嘅惡欲，必定愛噁心滅絕善念發生，遵照主道來行，使倒靈魂得救就著囉。殊不知有等假善嘅人，背聖教，離道理，存竟惡慾念頭，任意行事，係咁樣，算唔得係聖教中人。好比朝廷設倒律法，懲治子民，除開行惡嘅人民，安置善良嘅百姓。誰不知，還有不肖嘅子弟，唔狂律法，謀財害命，奸拐偷盜，做樣樣嘅惡事。可見國家嘅律法，係使佢咁樣行為唔。故所以愛看教嘅邪正，人行善與唔行善，唔可以將佢來比較。汝等講教內嘅人，比教外人更過行惡，時唔係十分褻瀆嗎？ 第三十三節 耶穌教非外國的教 客問：耶穌教雖然係真，但係外國嘅教，可以唔使從佢。 答話：黃金唔使揀擇地方，獨係精就貴重；道理唔論方向，獨係真就愛尊崇，正係天下萬民嘅道。好比孔子、孟子生在鄒國、魯國，但係其道傳到齊晉兩國。又舜帝係東夷人，文王係西夷人，中國滿下尊佢做聖人。佛氏嘅邪教自天竺傳來，係滅倫敗俗嘅毒，汝等滿下也敬拜佢。吾等聖教嘅道，有根有源，句句真實，可以引帶人生前行善，身後得救，來享永久嘅福。汝翻下轉作佢係閒事，唔肯信從佢，時唔係使人可惜嗎？兼且耶穌聖教，出自東方，傳到西國，各國聖人嘅教，雖然有可取，但係各執己見，粘緊世俗嘅遺傳，不過像燈燭嘅光，僅可照自己國中。天國嘅道，如同太陽噔，天下萬國都照得倒，唔可以話得係外國嘅教囉。 第三十四節 不可拜假神 客問：真神如同皇上，眾神好比百官，拜真神也應當兼拜眾神唔。 答話：真神係無所不知、無所不能，唔像人主治國噔，愛用官員來幫助。天上雖然有天使，不過真神所造，聽命令指揮，唔受人拜跪。若使世俗所設立嘅假神，更過唔係真神嘅官，係做真神嘅敵。樣邊解呢？好比世界皇上嘅欽差，必定先行自家尊崇其君主，又愛教子民，守君主法律。設使有一隻官員，自家唔尊崇其君主，又唔教子民守法律，翻下轉教子民尊自家與皇上一樣，時唔係叛逆嘅官員嗎？查廟中所立嘅假神，自家唔恭敬真神，又唔教子民恭敬真神，翻下轉誘惑人恭敬自家，使人祈福求佑在自家。係咁樣，時唔係叛逆嗎？既然知假神係叛逆嘅賊，可以敬佢嗎，可以棄絕佢嗎？若使人敬假神，逆真神，就好比百姓叛王從賊一樣。等到世界末日當時，真神責罰假神，也都責罰拜假神嘅人。故所以魔鬼唔遵神命，切勿拜佢，愛棄絕佢，正可以做得。 第三十五節 大意論拜神嘅法 客問：想拜真神，唔知樣邊正可以拜得？ 答話：拜真神唔使設立廟堂，唔使雕刻偶像，因為神係無所不在；唔用三牲果品元寶香燭樣事，因為神係至富有嘅，因為神唔居住人手所造嘅屋，天做其座位，地做踏腳凳；唔用人所用嘅物，佢係畀萬樣嘅物件。吾等大家獨係想人嘅心誠實來拜真神，每日臨食飯嘅時，應當祈禱，多謝養育嘅恩，求神祝福所食壯健身體，曉行本分嘅事；或者自家在至靜至密嘅屋誠心祈禱；或者與一家人每日早晚聚集，大小唱詩或讀幾節聖經書，一隻人出聲祈禱，眾心默和，就係拜神。每逢禮拜日，入教堂與眾人聚集，牧師講聖書、教導、警醒、勸誡、安慰、唱詩、祈禱，這係拜神大略嘅形式囉。 第三十六節 論異端 客問：真神應當敬拜，但係世俗通行嘅事，如同看風水、揀日、算命、占卦、看相、求籤，也冇犯法，做乜嘅咸人唔好咁樣行為呢？ 答話：邪與正唔以並立，好比楊朱與墨翟嘅教，若使唔棄絕佢，孔子與孟子嘅道就唔行。設使唔棄絕邪教異端，正道就唔興。如紫色奪開朱色，用魚眼珠紊亂珍珠一樣，就唔純淨，邪能寬正，正唔可以容邪。故所以查察明白，正唔怕畀異端來誘惑，就十分好彩囉。 第三十七節 大意講論靠風水生禍 客問：世人建造房屋，安葬先人嘅地墳，滿下也愛倚靠風水來得福，係唔係呢？ 答話：樣邊喊做風係東西南北嘅風；樣邊喊做水，江湖河海該等水。古人做屋葬地揀擇地方，唔係因為子孫貧富得福嘅計。大約做屋不過看地方高低，水路遠近，風勢大小。若地基過低，必定受水浸；水路十分遠，用水就艱難；風勢猛烈，狂怕吹崩屋；若係冇風，人就容易生病；這就係正經嘅風水。若使講葬地墳，就愛揀高山燥爽，藏風避水。地方燥，棺木冇咁容易爛；藏風草木冇事損傷，避水，墳墓唔怕畀水沖崩，子孫免開掛心；這就係葬地墳，正經風水囉。可惜世間人好奇怪，聽地理先生嘅說話，閗多信子孫有興衰，與屋場地墳風水有關涉。殊不知有等愚蠢嘅人，妄用錢銀來尋山墳，其家財漸漸用盡就變做窮人。或者因為祠堂，或者因為地墳，起造當時，兩造械鬥，同室操戈，殺死子弟，打官司，傾家敗業，種種惡習生了好多禍患。誰不知，作善降祥，作惡降災殃；死生有命定，富貴在乎上帝安排，兼且上古有祠堂，無葬地墳。孟子都有講，古時人父母死，安置在山坑曠野，唔擇龍穴方向，地理如果有應驗，古人就噲冇後代囉，樣邊講古人子孫更過多呢？今世嘅人，滿下係古人嘅後代，可知信風水來得福，係後代人假話。查考地理邪術起頭，在晉朝有隻喊做郭所說，在後佢自家也被牆□死。後來有隻楊筠松，做《撼龍經》。又曾文迪，做《青囊序》。這兩隻人，其子孫也唔興旺。雖然精通地理嘅邪術，翻下轉遭禍患。俗話都有講，算命先生半路亡，地理先生冇屋場。兼且夏商周三代當時，堪輿唔曾出，富貴還勝過今日。西國諸邦，唔信堪輿龍穴方向，富貴甲於天下，可知福貴由天就明白囉。中國因迷信風水，禁止開礦，本來係富有嘅國，反轉貧窮。自鎖銀櫃，甘受饑寒，都唔醒悟。好比四書有講，無使土親膚，親死安葬，係做人子女儕至好嘅方法。至緊要，唔好停柩來尋地墳，搬來移去，來望發達。甚至到有等將父母該屍骸裝落棺材肚裡去，在屋家停三兩年也有，停十年幾載也有，以為係出奇嘅貨物噔，等有好價錢來賣，做乜嘅有咁殘忍嘅心呢？故所以呂才、司馬溫公、逍汸，這等賢人，出力來辯駁，信風水係假，想燒其書，滅開其說話。可知唔好信地理先生，來畀佢欺騙，倚靠風水，就得福，實係會生禍。好比俗語有話：「地理先生慣說空，指南指北指西東。此穴若果公侯地，何不留來葬乃翁。」將這幾句俗話來想下子，就知得風水唔可以使人得福囉。 客話卷三 第三十八節 講論擇日與揀方向嘅假處 查考周成王當時，有隻越裳氏來朝，在後轉嘅時，唔記得轉嘅路，在乜嘅方向，周公就將黃帝出戰用嘅、喊做徵車，照其上下樣來做指南車。畀佢，雕刻一隻木人，舉手指南，使佢在面前帶路。今下羅經嘅枚針，也係照指南車做倒嘅。但係甲子係黃帝吩咐大撓所做，前時唔曾有年月日時紀念，每年看倒花開花謝，就正知春天與秋天。大撓就占斗柄初昏所指，用甲乙丙丁戊己庚辛壬癸為天干，子丑寅卯辰己午未申酉戍亥為地支，相配成做甲子。查考其原意，造南針，係定行路嘅方向；造甲子，做紀念年月嘅變換；唔係因為做屋葬地來設倒嘅。古時人興工，唔揀日，冇尋方向，唔曾聽倒有沖犯三煞。今下泰西各只國，有咁樣嘅陋習冇，佢做各樣事，更過順適利便。現今世俗，該等人，畀張天師誘惑，每擺做一件小事，都愛揀時擇日。或者同時嫁娶，同日開張做生理，結局多有唔同。有等在該時係生日，有等在該時係死日，也冇吉凶嘅分別。好比武王用甲子日興旺，紂王用甲子日衰亡。二王同日交戰，有勝有敗，因為吉凶嘅權，在天上獨一活神畀倒嘅。從逆就凶，惠迪就吉，禍福冇門，為人自家招倒嘅，與大撓所造嘅甲子，黃帝所造指南車，有乜嘅關涉呢？ 第三十九節 講論算嘅假 算命嘅法術。先行在戰國當時，有隻鬼谷子，其名喊做王詡，妄談五行生剋，定人禍福，以年月日時，分配天干地支，好比金木水火土，閗多講相生相剋，推算人年歲，或長命，或短命，來欺騙愚蠢嘅人。做乜嘅唔思想下子，每一隻時辰，生育人類，計唔出咁多，也有做王做帝，也有公侯將相，有等富貴，有等貧賤，有等命長，有等命短，唔得一律過。雖然雙生嘅孻子，所當倒嘅光景，也有分別。孔子有話，生死富貴在天，唔曾話在乎八字。好比做人亞爸儕，唔顧其等孻子嘅順逆，先行係愛這隻打該只係嗎？時唔係順儕就愛佢，逆儕就惱佢嗎？何況天上至公義嘅神，更過安排定著。可見算命有乜嘅益呢？兼且今下學算命該等人，好多係眼珠盲嘅，或者係江湖子弟，不過係用這等邪術，來騙人嘅錢財就係咯。 第四十節 講論看相嘅假處 真神上帝，造人五臟六腑，筋骨皮毛，四肢百骸。自天子至到人民，大抵同樣。多少分別嘅，不過肥瘦黑白唔止。窮儕食稀粥菜湯，居信該等屋，唔係十分幾好；富人所食嘅，朝魚晚肉，所住嘅高樓大屋，自然氣色唔同。試看下窮富、安樂、辛苦、壯健、薄弱，實在難知後來光景樣邊結局。有人先瘦後肥，先肥後瘦，先富後窮，先窮後富，更過難加先知定。又有面貌相似。如同舜帝噔其眼珠有重瞳，項羽眼珠也係重瞳，因為乜嘅緣故，一隻仁慈，一儕兇惡呢？又陽虎其相貌與孔子一樣，做乜嘅一隻係聖人，一隻係奸人呢？孔子話：「以貌取仁，失之子羽。」今下人做乜嘅唔信孔子話，反下轉信人欺騙來看相呢？但係看你嘅法，不過看佢或者聰明，或者愚蠢，或者其性情狠惡，或者馴靜，查察其說話行為，大略知多少唔止。如同醫生看病人嘅外形，大概知其病寒熱輕重。殊不知術士看人嘅眉額耳鼻，就判斷終身吉凶，正係欺騙人嘅說話。吾等愛知吉凶禍福，在乎真神上帝安排。 第四十一節 講論占卦求籤測字嘅假法 卜卦求籤測字，與拈鬮擲骰冇分別。或者應驗與唔應驗，滿下也冇定著。時常看倒測吉，又變做凶；卜倒凶，又翻轉吉。有成下子湊著應驗，就話有靈；若使唔應驗，就唔敢聲。做乜嘅唔想下子，測字卜卦，有成百擺咁多，也怕有一兩擺應驗。好比一隻人，唔曾習練過射箭，日日都去射，必定有幾擺射中；唔係實在射中，不過忽然間射中唔止，術士用周公書「卜世三十代，卜年八百。」證卜有靈，做乜嘅唔看下書經《召誥》篇有咁樣寫倒：「惟此歷年，我不敢知。」這兩句說話，係借夏商兩代嘅光景，來警戒成王卜卦冇應驗。可見同朝嘅召公，都唔用周公嘅卦爻做憑據。又周朝七百年當時，孟子有話：「數則過矣。」孟子時唔知周公嘅卜卦嗎？又古文有寫倒只人，其名喊屈原，佢去求卜卦，在後詹尹回答佢咁樣話：「夫尺有所短，寸有所長。物有所不足，智有所不明，數有所不逮，神有所不通。用君之心，行君之道，龜莢不能知此事。」這咁多句說話嘅意思，凡營謀一件事，或做一件物業，唔可以加先明白斷定。咁樣看起來，可知古人，早也知得占卦係冇用。求籤也係一樣，向菩薩面前求籤，或者應驗與唔應驗，係忽然間嘅事，唔係菩薩可以使得倒。信求籤儕，唔單止冇益，兼且有損害添。測字嘅術士，好多係貧窮人，佢若使可以為他人謀利，時佢自家唔可以謀得錢財嗎？吾等有時與佢辯論，至到冇說話回答，佢自己就話，吾也知係騙人，無奈家窮不得已藉這等來度日，！咁樣，就可以知占卦求籤測字，確實係假，唔使思疑囉。 第四十二節 講論菩薩滿下係假 客問：耶穌教，理應信崇。但係我中國所拜該等菩薩，多由帝王所封，其中時冇一兩隻係神嗎？汝等一概棄絕佢，係乜嘅緣故呢？ 答話：中國自釋教與道教漸漸興，拜菩薩嘅風俗就盛行，千奇萬怪，各處地方，有各樣嘅神，講唔盡咁多。共總來講，不過二樣。第一樣，指生成嘅物件為神，好比有等拜天地日朋星辰。殊不知真神造天地，係畀人居住；造日月星辰，來光照世間人；造萬物來養育人，如同亞爸預備產業屋舍燈火，與各樣物件，保養子女一樣。設使子女唔敬亞爸，反下轉敬屋舍燈火，咁樣做得嗎？吾等知天地中，有一位大主宰，每日受其恩賜，理當多謝，唔好敬天地做神。第二樣，指死後嘅人為神，如同敬玉皇、老君、真武、文昌、關羽、城隍、土地、社稷、真君、晏公、天后、張天師、神仙、雙忠、三山、佛爺、觀音、閻王，與各樣雜神。大約這等係通國所敬拜，另有各處所拜，唔知幾多。獨係將這等通行敬拜嘅，辨其來歷出處，自然知虛假噲棄絕佢囉。 第四十三節 講論帝王有封神嘅權 客問：紊亂拜神，當然唔好，但係經帝王封過該等神，時唔好拜嗎？ 答話：帝王冇封神嘅權。或者講玉皇所封玉皇，係漢朝尾嘅人，到宋朝徽宗政和六年，正封玉皇為天上上帝。玉皇既然受人封，佢樣邊有本事封別人呢？況且帝王有能為封神，佢係人類，不過有權封本國人做官，管理本國，冇權封外國人做官，來管外國，樣邊佢還有本事封死人為神，管理天地呢？若使有本事封死人為神，不必封別人，獨獨封自己祖公，做一隻大神，保佑子孫永世做帝王，時係咁樣唔好嗎？樣邊講自夏朝到今下，換開二十幾朝，封神嘅事，唔單止明白嘅人知其係假，就係有多少智慧嘅人，也都唔肯信。不過藉咁樣使生人忠節，使到人唔敢生出別二樣心就係囉。 第四十四節 講論玉皇 查考宋史，玉皇生在漢朝尾，姓張，其名喊做亞儀，真定府行唐縣人。自細當時，學習老君教，避世在武當山，採藥煉丹，醫治病人。到宋朝徽宗皇帝當時，有隻術士林靈，平素也係學習老君嘅教，誘惑皇上。徽宗被佢迷惑，封張儀做玉皇上帝，寫符念咒，出命令被子民知，尊張儀為神，其意思係想佢保護國家長久。誰不知封張儀之後，冇幾久，徽宗父子妻妾滿下被金人捉去，受羞辱，講唔出咁淒涼，死在五國城。徽宗敬玉皇至誠心，喪國家，身遭死亡，玉皇冇本事去救。今下拜玉皇儕，做乜嘅唔將徽宗皇帝來做鑑戒呢？ 第四十五節 講論老君或稱老聃 查考《綱鑑》，老君生在周尾，春秋當時，其職分做史官，姓李，名耳。因佢年老，當時人稱其名老子。早時孔夫子在周敬王當時，周流天下，時常與老聃往來，跟問其禮儀。在後有等好事嘅人，做本老君嘅小傳，閗多講佢生在殷朝武丁嘅時，懷胎八十二年，破其肚胈，右片□□骨，正生出世來，頭顱毛與須，滿下也白，故所以稱佢係老子，又稱佢元始上帝。到唐朝高宗王當時，又加號玄元皇帝。又到真宗當時，復加號太上老君。可惜今下人，唔曉查察，明知佢生在天地之間，翻下轉稱佢元始天尊，設倒老君廟來敬拜佢。獨韓文公知佢係假，話該等係邪說，比老子做坐井觀天，見識細小，道理唔正，想燒開其書，用先王嘅道來教佢。愛查考古文儕，就可以明白囉。 第四十六節 講論真武 查考真武，湖廣湘陽縣人，姓劉名長生，自細歸隱在武當山太和庵。有一日清早晨出門，天氣黑暗，有危險地方，都看唔倒，失腳跌落深坑去，散發破腸來死。其嘅門徒假說師傅升天，欺騙眾人。有等愚蠢嘅人，被佢誘惑，一傅百，百傳千。到明朝永樂君封佢做鎮天真武大將軍，望佢保佑萬代天下太平。殊不知，崇禎係永樂君王後代嘅子孫，忽然間被李闖害迫，在煤山自盡來死。真武當時，唔知去保護來救佢，可見世人容易受人欺騙，聽人稱佢係神，就去崇拜佢，自細到老都唔曉醒悟，真係令人可惜囉。吾等愛知認識造天地嘅主，誠心服事，就唔被世俗來誘惑，唔怕走落魔鬼黑暗嘅路途，行轉正大光明嘅道就著囉。 第四十七節 講論文昌 文昌姓陳，名子春，係宋朝嘅狀元。到元朝仁宗三年，封佢做文昌帝君，意思係表明其才學最高。殊不知，後來該等讀書人，妄想功名，稱佢做司祿嘅神，佢有主權保佑人得功名，立倒文昌廟來敬拜佢，望佢保佑入學中舉。做乜嘅唔查考宋朝以前，唔曾有子春當時，也有人考功名，該當時，又有那儕做司祿管理功名呢？好比有一隻，其屋家貧窮，佢又唔勤力讀書，又唔明白文義，徒然去拜文昌，時咁樣都可以入學中舉嗎？設使勤力讀書，又極有才學，自然國家憑文取士，自古到今也係咁樣。故所以四書有講：「君子求諸己。」唔曾話讀書人愛求文昌。可見文昌，唔可以保佑人得功名就明白囉。 第四十八節 講論關公 關公本來係姓施，其名安做壽昌，山西蒲州解梁人也。後來改姓關，其名喊做亞羽，別字雲長，係後漢昭烈皇帝嘅武將。不過稱佢後漢嘅忠臣唔可以稱佢做護國嘅神。孔明當日，托佢守荊州，在後佢也失開荊州地方。可知生前冇本事保護漢朝，臨死又冇本事保守自家屍骸，死後佢樣邊有能為保佑別人呢？有等好事嘅人，做明聖經，假託關公嘅名，話關公掌守天門，有主權使人或禍或福。殊不知劉備、張飛滿下為關公報仇來死，佢冇能為顯聖保佑；阿斗捧印出降，佢也冇本事顯聖復國。今下人話關公顯聖，護國庇民，做乜嘅聽人誘惑咁甚呢？或者話失國家，兄弟並死，這等係天數。既然知天數，就應當敬拜定數嘅上帝，與關公有乜嘅關涉呢？關公在生忠義，人應該學其忠義，唔可以望佢保佑。今下人將三牲、果品、紙錢、香燭、想佢保佑，誰不知曹操當日待關公，上馬題金，下馬題銀，三日一小宴，五日一大宴，佢尚且唔受其嘅；何況今下人，奉一的微禮，時可以得佢保佑嗎？不過傳其名畀人效法，唔係保佑人。 第四十九節 講論城隍 查考城隍兩隻字嘅意思，係城外濠溝名，俗話喊護城河。又話有水嘅，就喊溝，冇水嘅；就喊隍，唔係人名。查考其歷史原因，晉朝有隻司馬炎帝，看倒各府官員唔忠心，治理子民又冇仁愛，就將漢高祖一隻忠臣灌嬰嘅像畫竟在木牌頂高，安置佢在贊德廳，其意思，使各官員看倒佢，來效法其忠心，行其仁愛。殊不知畀在後嘅人，假稱係守城嘅神，改其名喊做城隍。因咁樣，各州府縣，做倒城隍廟該等官員，初壹十五，滿下都去燒香，望佢保國安民。做乜嘅唔想下子，佢在生當時，佢冇能為免脫死亡；既然死開，又那還有本事來保佑人呢？又閗多講，城隍三年一任，假說某人死開，就去做城隍，十分係好奇怪。一隻人傳虛，眾人就聽，真係使人好笑，又使人可惜囉。 第五十節 講論土地 查考左傳，社為土地嘅主，封土公，稱土神。後代拜社，做土地伯公。查考社字，係平水土嘅官銜，有能為管理后土，其名即係句龍，古書有講，句龍在顓頊皇帝當時，佢做管理后土嘅職份，做平水土嘅官員，督理開水路，平水有功勞，如同今下督理開河嘅官一樣。人死也噲離開生前嘅職份，時永久都係管理后土嘅主嗎？今下人唔去查考，因自己好利，塑泥像，其手揸團金，裝成老人相貌，就稱佢土地伯公。又話每年三月廿九，係土地誕，搭棚做戲來敬拜佢。又有等在各田頭，設倒土地伯公來跪拜，作為咁樣，報其功勞。殊不知土產萬物，係由造化主恩賜，唔報恩土，反下轉報土嘅功勞，如同得亞爸產業，叩頭在田地，係咁樣合唔合呢？ 第五十一節 講論社稷 查察社嘅意思，係平水土嘅官，稷係教子民耕種嘅官。今下世間人，將社稷兩隻字，共做一句來講。查考稷嘅來歷，係黃帝嘅孫，文王十代嘅祖公，其名喊做亞棄，才學十分廣究，看地方高低燥濕，種植蔬菜，又極噲耕種五穀。在堯舜嘅當時，做農稷嘅官職教子民耕田，自該時子民，正得倒衣食，故所以人稱其名后稷。佢教子民耕種，本來係有益畀人。但係佢冇能為，使倒年成豐熟，好事嘅人。稱佢做五穀神，求佢保佑田園茂盛，五穀豐登。這等人，滿下唔識生物養人嘅活神，來拜先代嘅人為神。殊不知后稷係上帝所生，畀等智慧佢，來教子民。書中有話：「郊社嘅禮，所以祀上帝也。」唔曾講祀后稷，郊壇圓祀郊，係報答上帝造天嘅功勞；社壇方，祀社，報答上帝造地嘅功勞。上帝管風雨、田園、菜蔬、五穀、樣事、係天地人物嘅大主宰。 第五十二節 講論真君 真君姓許，名遜，其號安做敬之，係江西南昌府生米鄉，後漢三國當時嘅人。這隻人極忠厚，做過旌陽縣官，治理子民極有仁愛，好習練老君嘅教，施藥煉丹，死後葬在許家莊。後來遇著江西大水，沖崩民間屋舍，假作謠言，孽龍作亂，若使唔係許遜擒住，江西就噲變做湖囉。許遜門邊有一隻大潭，該等水周長年冇乾，側邊有一樖鐵色嘅樹。就係話，該樖樹與該只大潭，做祭孽龍嘅地方。又話許遜一家人，男婦老少雞狗，白日升天。傳等假話，誘惑好多人。至到宋朝徽宗皇帝，也習練老君道教，封許遜做神功妙濟真君，賜倒一隻匾額，寫「竟王隆萬壽」，故所以今下稱其嘅廟堂，話萬壽宮。又稱做江西福神，男女都去敬拜，望佢保佑。宋徽宗封好多道教人為神，到亡國當時，冇一隻神來救佢。這隻許遜既然冇能為救其恩人，佢樣邊還救得別人呢？今下拜許真君儕，做乜嘅唔曉醒悟棄絕佢，來服事真神呢？ 第五十三節 講論宴公 宴公係江西臨江府人，名戊子，宋朝時代人。既然中開進士，奉命出海，一往一來，唔曾遭倒有危險，因咁樣有功勞，封佢做侯爵。至仁宗當時，辭職做子民，在後得病死開。今下人想倒佢在生忠厚，走海冇失誤，作為宴公能保水道，故所以有好多冇知識嘅船戶拜佢為神。殊不知行船嘅人，若使入新港口，或遇急灘，必愛請本土人，習慣水路嘅做稍公，揸舵來帶水路，或使曉行水路嘅人唔曾到，船就唔敢行。可知所倚靠係在乎人，唔在乎晏公。今下做乜嘅咁愚蠢，唔曉醒悟呢？ 第五十四節 講論天后 天后係福建，興化府，蒲田縣，林氏女，名甜。其爸與其哥，打魚為業藝，佢十八歲當時，在屋家紡織，有一日吹好大風，這隻甜在眠床睡開。 在夢中講狂話，其在側邊喊醒佢。這隻甜就話，吾夢中在海面救我哥與老娣，吾用喙啣我哥，用手捉緊我老娣，因為母親喊吾，吾下開喙，我哥就浸死開。係咁樣與佢共圍村住嘅人，就造謠言話，這隻甜女，得倒道，有能為救海面風浪所害嘅人。到宋朝當時，封佢做靈應夫人，又至明朝永樂君封佢做天后聖母行水面。該等人，歡喜立倒天后像，在船望佢保佑，水路平安，各處也做天后廟來拜佢。誰不知每年海面沉船喪命，唔知幾多，天后做乜嘅唔去救佢呢？竟係聽倒死生有命，上帝主宰，能管風雨禍福；唔曾聽倒敬天后，得倒保佑。可惜世間唔曉醒悟。 第五十五節 講論張天師 查考鑒史，天師嘅祖公，係張道陵，習練老君教，煉丹畫符，建醮酬神，驅邪捉鬼，當時極少人信。到唐明皇當時，有隻張虛靖，用妖術騙明皇，有本事使人長命，明皇被佢迷惑，封佢做天師。但係明皇不過七十零歲就死，樣邊見得佢長命呢？到宋朝當時，有隻張強耀，巧言誘惑，皇上徽宗就賜佢世襲，因咁樣歷代稱做張天師。後代該等君王，唔查考其假處，依舊准佢，徒然食國家嘅俸祿，冇的益處畀國家與子民。若係講其符頭十分靈，徽宗敗亡嘅日，佢冇本事畫符來救，係咁樣就係背恩。兼且又冇法來趕鬼，不過聽倒其假名聲，唔曾看倒佢行出實事來。天師嘅名，因佢學習星學，料理歷數，前代用佢，有功受祿。自明到今，滿下用西洋歷數，張天係空存職位，佢出等符法行世，也係迷惑子民。天師唔倚靠上帝，樣邊曉趕鬼呢？ 第五十六節 講論神仙 自從開天地以來，有生就有死，係一定嘅理，獨係有等貪生怕死嘅人，閗多求長生不老嘅術，誤信老君道家嘅說，坐上運氣，修藥煉丹，但係佢到底也噲死，秦始皇、漢武帝，滿下求長生不老嘅術，到底也冇應驗。可惜有等好事嘅人，假造仙家小傳，將富貴貧賤，男女老少八隻字，裝做八隻人該名，稱佢係八仙，弄假成真，就喊漢鍾離、呂洞賓、張果老、曹國舅、籃采和、李鐵拐、韓湘子、何仙姑，共竟為八仙。查考書中所載，這八隻人，生在唐朝當時，有生有死，樣邊稱得係八仙呢？漢武帝被術士誘惑，佢臨死當時，就醒悟話：天下樣邊有仙人，滿下也係妖魔邪怪，唔止，這就係閱歷嘅說話，可見好仙嘅人，到底佢也知係冇仙人囉。 第五十七節 講論雙忠 查考綱目，知雙忠係兩隻人，一隻係張巡，一隻係許遠，為睢陽太守。張巡做真源令，當時有隻安祿山作亂，張巡起兵討賊，極有能為，又愛其手下嘅士卒，故所以屢擺打敗賊人。在後賊人，使尹子奇圍困睢陽，張巡帶兵入睢陽與遠合做一營兵，與安祿山作亂賊日夜苦戰，殺賊人好多，殊不知糧餉用盡，瞧陽城就失開。張巡與許遠，被賊人捉倒，這兩隻人，雖然受苦死，佢也唔歸服賊人。在後做史記儕，評論這兩隻人，盡忠完節，滿下係天命。今下人唔學佢兩儕嘅忠義，徒然用香燭來拜佢，係咁樣有乜嘅益呢？ 第五十八節 講論三山 查考三山，係三隻山名，一隻係巾山，一隻係明山，一隻係獨山。相傳宋朝當時，有隻帝昞，被元兵追迫到三山地方，有三隻人，手揸利器，打退元兵。在後問這三隻人嘅姓名，但係佢話，我三儕係兄弟，居信在前面山中，講妥以後，該三隻人就走開。在後去尋佢尋唔倒，冇的蹤跡，因為咁樣就造謠言話，這三隻人，係三山嘅神，加封到三山國王，可見這等事，如同摹風捉影一樣。在後帝昞又兵敗，又走到零丁洋來死，又唔見這三隻人再來打救，佢就知這件事，確實係假，唔使思疑囉。 第五十九節 講論佛 查考佛書《普曜經》，出在天竺國，其爸淨梵王，其耶摩氏，生一隻太子，其名如來，姓釋迦，號牟尼，在周昭王甲寅年四月初八日出世。自細游手好閒，到十九歲，四門游觀，見人由生而老，由病而死，其心肝似覺極憂愁，即時就出家修道，戒殺生物，朝晡念經，食齋施濟孤寡，燒衣破獄，超度樣事，也教徒弟。係咁樣佢老當時，生只毒瘡，死在雙樹下。其嘅徒弟，作為佢既然落開涅，稱佢做佛祖。自該時有等無賴之徒，丟開父母兄弟，親戚朋友，削髮食齋，換衣服，避稅務，游手好閒，藉佛嘅名來討食。這樣教，傳到西方幾隻國。到漢明帝當時，佛教嘅毒正入中國。到唐朝憲宗當時，有隻極好嘅人臣係韓文公，勸諫該等佛骨愛燒開佢，或者丟落海肚去，就可以免開後患。又到宋朝淳佑當時，有隻忠臣胡穎，做廣東經略，使毀爛佛像，使該等和尚與尼姑還俗。又程夫子話，佛教害人還甚過楊墨嘅教。今下讀書人，也被佢迷惑，題錢來做庵堂，寺觀，施等田來養佢，想望佢保佑得福。殊不知拜佛至誠嘅，就係梁武帝，都被只將軍，其名喊做侯景，害迫佢死在台城。今下看倒拜佛，該等國其國必定弱，子民又頑硬，可見佛教係冇益。佛教講西天，就係天竺國，今下其名喊做印度與暹羅，隔條細海屬英國管理。同這地球同一樣物類，做也嘅稱西天樂土，實在使人好笑。 第六十節 講論輪迴嘅假 釋氏所講轉世生嘅事，大唔合人情物理。愛知自太初用坭土造人身體，吹氣成人靈魂，故所以人生子，就有身體靈魂。禽獸雖然冇靈魂，也各從其種類來生。真神祝福佢話，生育眾多，鋪滿通天大下，人物自然昌盛，使乜轉世來生呢？人為萬物之靈，各樣物係被人用，做乜嘅使戒殺生物呢，又話善人轉生做人，惡人轉生做野獸。將來看到世人善嘅少惡嘅多，狂怕過開百零年，滿下變做野獸囉。又話今生食肉四兩，來生還肉半斤，世間人食肉嘅多，唔食肉嘅少，一生人食肉計唔出咁多，雖然轉世千百擺咁多，也噲還唔清楚。兼且古聖賢，滿下也食肉，時又係變野獸來還債嗎？今下人極愚蠢。被釋氏褻瀆都唔知，翻下轉有人信託生為真實。若有再世，不可結婚姻，驚怕娶到亞婆；唔好使牛，驚怕使倒祖公，時唔係背倫嗎？或者話人冇輪迴，樣邊有富貴貧賤呢？殊不知世人境遇有唔同，孟子話冇君子，野人冇人料理，冇野人，君子冇人養，這係天下嘅通義，與輪迴有乜嘅關涉呢？一隻人行善，照上帝嘅道來行，雖然當倒貧賤，靈魂也可以升天；作惡事來逆主，雖然當倒富貴，靈魂也噲滅亡。今下眼前窮富，有乜嘅相干呢？上帝將人死後嘅靈魂，必定有賞罰，斷冇轉世嘅理。吾等愛知人物嘅來由，就唔怕被人迷惑囉。 第六十一節 講論觀音嘅假 查考《觀音經》，講妙莊王嘅第三女，其名妙善，出家修道去白雀寺住宿。其爸聽倒，用火燒開該間白雀寺，獨獨觀音手揸楊枝投水浸死，故所以話佢化身為神。查考各國地輿，也冇妙莊國土。釋氏想倒世間最易迷惑嘅，就係婦女，因咁樣就塑女像，話係觀音，能救苦難，誘惑婦女捐錢來養該等和尚與尼姑。一傳百，百傳千，唔知佢係假，有等冇孻子嘅求送子觀音保佑，佢水浸死嘅求魚籃觀音，受苦嘅求千手千眼觀音。殊不知有能為救人苦難嘅，獨係一隻救主，可知虛假嘅觀音，樣邊有本事救人呢？ 第六十二節 講論閻王嘅假 上帝造天堂，用其來賞善人；造地獄，用其來罰惡人。罪有大小，罰有重輕，總係上帝主意與古人冇關涉。今下所講地獄十八重，閻王十位，好比姓曹、麻、於、薛、昌、蕭、包、寇、韓等，每隻管一重，另外還有八重，就唔知那儕管。係咁假嘅說話，不過係騙愚蠢嘅人，難騙明白嘅君子。好比姓包儕，在宋仁宗當時，做河南開封府嘅官職，十分忠直，唔畏有權尊貴嘅人，又敢罰該等奸雄人。時常揸正王法，像鐵石心腸噔，有犯法嘅人，雖然係皇帝嘅子孫，國家嘅親戚，也唔赦其罪，必定照律法來審判。故所以當時，該等人稱佢做鐵麵包公、閻王包老。等到包公死開以後，有等好事嘅人稱佢做地獄閻王，又管陽間生死。試問下，宋朝以前唔曾有包公，係那這掌地獄，佢自家生死又那儕管理呢？詩經有寫倒咁樣話：「畏天之威，惟皇上帝。」意思即係話，獨係畏上帝嘅威勢，故所以願吾等愛敬畏管生死嘅大主宰。 第六十三節 講論雜神 世俗人嘅屋家，滿下拜灶神，稱佢做司命定福灶君。殊不知有命在天，唔係灶神管理。又話福自天申，也唔話灶神定嘅。若使得罪於天，唔係灶神可以赦免。有真神在天上鑑察，確實冇灶神來傳命令。又看倒，該等有細子嘅屋家，在床腳下安倒只神來拜稱佢床頭婆。誰不知極污穢嘅地方，時都有神在嘅里嗎？甚至到有等去拜樹頭、竹頭、田頭、石頭、牛馬龜蛇樣事。也話佢係有神一隻去拜，儕儕也去拜。十分可惜，人為萬物之靈，反下轉去拜該等物類。今下有主嘅光都唔親就，這等人真係愚蠢囉。 第六十四節 講論乜嘅緣故聖會唔准人娶妾 客問：上帝十誡第五條，使人孝敬父母，照道理本來係至著嘅。若使禁人唔好娶細婆，十分緊要過頭。因為一隻人冇孻子，若係唔娶細婆來講，必定噲絕開後代。孟子都有話，做人孻子唔孝順有三樣，第一冇後代係大大唔孝順。唔娶細婆來生子，難免唔孝嘅罪。 答話：一夫一婦係真神上帝定倒嘅。上帝始初造倒一男一女，配成夫婦，生育人類，唔曾造倒一男二女，一女二男，世間人唔可以任意來改。愛男女均平，互相親愛正合。若係婦女無子，娶細婆生孻子來全孝道；倘或男人冇子，其婦女引誘別二隻男人來生子來全孝道，時係咁樣都合嗎？故所以一女不可配二夫，一個男人唔可以娶兩個婦女？兼且有子、冇子係上帝嘅主意，唔可以免強。孟子所講無後為大，係指別二樣，不過為舜帝推辭嘅意。好色嘅人時常借這等說話遮掩其心，殊不知淫心嘅就係唔孝順孝順嘅就唔淫心。兼且大婆與細婆嘅害處講唔盡，咁多每擺互相殘害，細婆得寵，毒死大婆，大婆唔寬容，又殺死細婆，破費家財，賣盡產業，子女終身仇敵，刀劍時常懷緊完身。係咁樣，有乜嘅孝順呢？孟子有話，游手好閒、好賭博、好打酒醉、戀慕錢財、私心妻子、任自家該耳朵來聽淫聲、任自已嘅眼來看淫色、好與人爭鬥，這咁多就係唔孝順。伯夷叔齊兩隻人，滿下也冇孻子，孔子稱佢做賢人。故所以愛除開惡風俗，棄絕淫亂嘅說話，行正人倫，正可以稱做孝順。若使假借娶細婆嘅名，唔可以稱做孝順。 第六十五節 講論傳人做乜嘅離開屋家唔服事亞爸亞呢 客問：汝等傳道嘅人，勸人生前服事亞爸亞，做乜嘅自己離開家中，唔朝晚服事，反下轉又教別人咁樣做呢？ 答話：愛知父母有兩樣，一樣係生吾嘅，一樣係造吾嘅。上帝做造天下人類大父母，四海之內，滿下也係兄弟。現今嘅人背真神、從異端、拜菩薩、各習邪事，這下唔打救佢等，必定受永遠嘅苦。好比兄弟兩個人，一隻在屋家服事父母，一隻出門做生理，有病，在屋家儕聽倒，必定暫時離開屋家父母，去救兄弟若使聽倒唔去，又話愛在屋家服事父母，眾人也噲嫌佢唔知骨肉嘅親，唔顧兄弟。今日吾等也係暫時離別父母，打救四海兄弟受苦，好比夏禹王治水，打救子民患難，八年離開屋家，三擺過其自己門邊佢也唔得閒落屋家儕儕也，唔敢話佢離別屋家，唔養父母，反下轉稱佢做聖王。今下嘅災難還廣究過早時嘅水災，倘若禹王再世必定教人改惡遷善，救身後靈魂。時嘗看倒好多人在屋家，唔離其父母，但係唔聽父母話，時常賭博、飲酒、食煙、偷盜，反下轉其父母憂愁。佢添在屋家，又有乜嘅益呢？吾等雖然離開父母出門，但係有一定嘅所在，時常寄信安慰父母嘅心，付等銀轉來供養，又托親戚朋友照顧，可以安心。或者有喜事與不測嘅事，即時就轉屋家料理，這就係兩全其美，樣邊話得唔孝順呢？ 第六十六節 講論一隻人唔好話進教係極難嘅事 客問：為救靈魂這件事本來係愛進教，但係實在艱難，係咁樣，樣邊打算呢？ 答話：據汝講咁艱難係難信呀，抑或難守呢？這兩樣也唔話得係難。究其實，聖道有根有源，有古人嘅事跡可以做憑據。看倒天地萬物、風雲雨露、一年四季，各樣物照其時候來生，係咁樣，必定知有一隻主來管理，信從十分易。又知吾等人為萬物之靈，應接各樣嘅事，但係到底也免唔脫死亡肉身，歸轉泥土，靈魂永久都在等待賞罰，或者歡喜，或者受苦，永遠冇變。世上嘅苦刑還過輕，地獄嘅苦刑更較重，若使世上刑罰一死就脫，地獄嘅苦永久都有，唔可以脫得。好比大海嘅水，每年滴一點到也噲漏盡；普世上嘅沙，每年除去一粒，等久下子也噲去完。係咁樣，都話進教艱難，就係甘願受永久嘅苦囉。況且世間該等人求名求利，必定盡力營謀，為功名，日夜讀書；或者耕田種作，經過好多風霜雨濕、朝夕勤勞。又或者飄流跋涉，想得錢財都不以為難，翻下轉以奉教守誡為難，就十分愚蠢囉。殊不知唔曾入教嘅人，比較守誡更過難。樣邊講呢？因為該等財主人，其心肝冇的忌憚，姦淫賭博、好打酒醉、食鴉片煙、倚恃有錢與人爭鬥，家破人亡。又該等貧窮嘅人、心肝貪婪、做賊打搶、無所不為，至到畀官府捉佢坐監打靶。獨獨拜上帝，虔心守十誡，心內時常也安，家中和氣，咁樣，守十誡有乜嘅難呢？故所以愛及早回頭，服事上帝，倚靠主嘅功勞，就可以得赦罪，靈魂得救，享天堂嘅福樂。除此以外冇別樣嘅法，可以救世間人囉。 第六十七節 講論世間人雖然行善也唔可以得天堂嘅真福 客問：教外嘅人，其中也有善人，雖然唔拜上帝，靠耶穌，也行好多善事，好比施濟貧窮，修橋整路，照推下這等人必定得天堂嘅賞。 答話：想得君王嘅賞，必定愛順王法，忠心尊敬其君王；想得亞爸亞過愛，應當先行聽話，順行孝道。若使事君唔忠心，事父母唔孝順，唔單止冇賞，翻下轉惹怒氣得刑罰。好比有一隻做官嘅人，做各樣事冇噁心，料理子民也稱佢好，十分出名，獨獨唔尊敬其君王，兼且霸權壓制添。係咁樣，時可以得其君王嘅賞嗎？又如同有一隻人做人孻子儕，其行為十分好，交朋接友，滿下唔敢嫌，獨係唔孝敬父母又忤逆添。係咁樣，時可以得父母嘅愛嗎？故所以唔敬上帝唔倚靠耶穌，雖然行善事，到底唔可以得天堂嘅賞。今下世間人行善事，唔第真心悔改，不過想得名譽，勉強來做，既然得倒世人稱讚，有名譽，這就係報賞，又還樣邊得得真神嘅賞呢？人知這樣理，就愛尋入救主嘅門正著。 第六十八節 講論入教唔可以延遲 客問：自起初辨問到這裡，確實知上帝聖教正大光明，冇的嫌棄，可以使愚蠢人曉有智慧，驕傲儕曉謙卑，兇惡嘅噲良善，篤信順道而行實在，生前得安樂，死後得天堂永福。但係今下唔得閒進教，等待來年正入聖會好嗎？ 答話：今日聽明今日就愛信，這時醒悟即時就愛從。今下既然咁遲正知，做乜嘅還等待來年呢？好比有一隻慈心嘅財主佬，佢加先講明三日內想施濟窮人，該等窮儕聽倒就加先到嘅里等候，若使遲到，唔得得倒。咁樣，唔係該等財主佬唔畀汝，係汝自家遲到嘅緣故。今下上帝賜倒道理來這世間，信儕得救，唔信儕就定罪，唔係上帝唔救汝。時常看倒好多有道理明白嘅人，其心肝初初想信，但係冇一定嘅主意，一日遲過一日，一年遲過一年。係咁樣，罪惡日見日多，死期將到，就冇望得救嘅日。時可以等待來年嗎？況且吾等人最緊要嘅，就係靈魂愛得救。享福嘅，即係永遠同安樂、歡喜唱詩；受苦嘅，永遠淒涼，咬牙線齒，做乜嘅還愛等待來年呢？因為人冇有唔死，長命短命冇定著，唔知在那哩死，也唔知那年死，即使誠心祈禱，警醒來等待，還狂怕唔到得天堂，係咁樣來講，還可以等待來年嗎？兼且人嘅生命至薄弱，容易損傷，好比用一條絲線弔一隻大鐘，若使遇倒風雨侵害，忽然間一斷，就噲跌下落。照這樣比喻來講，人也係一樣，時好等待來年嗎？娶妻生子待老親，少時勤力唔使貧，池塘蓄水狂秋旱，積穀防饑免求人。這幾俗話係講，人情世務不過幾十年光景，尚且愛預備；今下吾等，因為靈魂得救嘅事，時好唔加先入教嗎？願吾等兄弟姐妹，愛除淨世間嘅繁華惡欲，朝晚祈禱，敬拜上帝，倚賴主嘅功勞，這就係我心所願。