荔鏡記 · 第三十九出 渡過溪洲

【金錢花】 （淨丑扮舡）新做渡船（舡）走如風＜蜂＞，紙船（舡）須用鐵艄公（鐵稍工），紙船（舡）須用鐵艄公（鐵稍工）。兄弟過船（舡）不放空，莫說我，只船（舡）是浪蕩，一日有千萬人。 （生旦貼上）三人走到赤水溪邊，三人走到赤水溪邊，未知過溪著若錢？未知過溪著若錢？一隻小船（舡）在岸邊，來載阮，不論錢。過了只溪即歡喜。 （淨丑?唱）船仔（舡仔）駛在溪中游，船仔（舡仔）駛在溪中游，問你三人去值州？問你三人去值州？有乜話共阮說，乜利市，乞阮收，載你三人過溪州。 （生旦貼唱）待阮等到日都晝（罩），待阮等到日都晝（罩）。坐人不知立人苦痛，坐人不知立人苦痛。金釵乞恁准花紅，千萬莫說阮三人，莫得牽山那匏動。 （淨丑唱）聽恁障說阮便知，聽恁障說阮便知，有乜金釵便提來，有乜金釵便提來。娘仔寬心莫煩惱，阮嘴（口）密成米篩。有人問我叫不知。 （生旦貼）待阮說乞恁聽，阮三人都是親情。伊是小妹，阮是兄，只是簡，相共行，卜去泉州探親情。 （入白）渡船（舡）拋泊在溪州，一任江山□任游。 水鴨鴛鴦拍櫓動，飛入蘆花不知收。（並下）