荔鏡記 · 第二十六出 五娘刺繡

（貼上）捧卜繡篋出繡房，金刀金剪盡成雙。畫花粉筆盡都有，五色線絨綠間紅。 【銷金帳】 安排繡床閨房東，掛起羅帳瑙（腦）麝香。針線箱、繡篋，益春常捧。內有五色絨線綠間紅，銅箱交剪對金針。伊人琴棋書畫盡都曉通。那是阮娘仔無心去弄。盡日懨懨，不知憶著乜人？別人私情，益春★(左人右再)伊人苦痛。勞堪逢著一好清秀郎君，共伊人合歡，恰親像十五冥月光光降。 陳三有一紙字，甲阮共伊送。今卜下只繡篋內，阮娘仔來看見，那歡喜便好；一卜著急，★(左人右再)得好？便做著急乜事。不免下只繡篋內，請啞娘刺繡。 （貼下）（旦上） 【長生道引】 早起梳妝正了時，抹粉畫眉點胭脂。行出珠簾看寶鏡，怨殺孤單空過冥。 獨坐繡房日漸昏，停針無語欲銷魂。山風故意度庭竹，欹耳頻疑（類疑）人扣門。拙時針線停歇，不免繡一光景解悶。 （潮腔） 【望吾鄉】 （旦）盡日無事整針線，逍遙閒悶心無掛。針穿五色絨共線，繡出鱗毛千萬般。線共針穿，步步相★(上毛下火)。引動人心情，切我守孤單。 （內調）一更鼓打北風颶，里打燈另打燈打丁，娘仔思君心不安。里打燈另打丁，里打丁打丁，值時共君加成夥伴（火伴），里打丁另打丁，里打丁打丁，即便得被燒枕不單。里打丁另打丁，里打丁打丁，里打丁打丁。 【望吾鄉】 （旦）繡成孤鸞戲牡丹，又繡鸚鵡枝上宿。孤鸞共鸚鵡不是伴，親像我對著許。 丁古林大。 無好頭對，實無奈何。 （內調）（旦）不免再繡一叢綠竹。 再繡一叢綠竹，須等鳳凰來宿。 （內唱）★(口?良)嗹★(口?良)柳嗹，嗹呵柳嗹★(口?良)嗹，柳嗹柳嗹★(口?良)嗹，柳嗹柳嗹★(口?良)嗹。 （旦）繡成犀牛望月圓，又繡烏雲閒月墘。雲遮月暗，犀牛無意，也親像我，對著丁古林大鼻。雲會消散，月會團圓。 不免再繡一輪光月。 再繡一輪光月，須待唐明皇來遊戲。 （旦）想起人情，切我魂魄散。心頭憔悴如刀割（刈）。 想許三哥， 伊百般苦痛，都是為我。著伊割吊，冥日心不安。 莫是無緣， 便做無緣隔遠，死去冤魂相★(上毛下火)。 我想來想去，無一人親像伊。 障好清秀郎君，甲人心頭★(左人右再)年肯灰（花）。 （又唱）且力針線放一邊，心頭怨切愁無意。若會隔斷林大鼻，一座清醮答謝天。但願逢著好兒婿，恰像蓮花開遍滿地。花紅共柳綠，且趁我青春少年時。 再尋二個（個）艷色繡絨來繡一般光景。（介）因何我只繡篋內有一紙字在只內？（介）原來（元來）句是一封書，不免開看。原來（元來）畫有一鶯柳，只尾有一首詩。 詩曰：鶯柳飛來無所依，盡日思春獨自啼。可惜 章台柳 色好，何時借得一枝棲？ （旦介）只鶯柳畫得是好，只必想是陳三畫的（個），甲益春送來。鬼仔即是成精，不免叫出來罵一頓乞伊。 （旦叫）益春，過來。 （貼上）（旦）你值去？ （貼）簡在只處。 死賊婢，你走去值？ （貼）簡在只聽候啞娘。 （旦）早使你力繡篋整理。 （貼）簡都整理便了。 （旦）我只處有乜人來到只？ （貼）只繡房內也無人敢來，那是簡來去。 （旦）飼你拙大，因乜不同人心意？ （貼）簡自細是啞娘飼，因乜不同心意？ （旦）你知。 （貼）簡都不知。 （旦）只繡篋內因乜有一紙字？ （貼）簡都不知。 （旦）你不實說，定著討死。 （旦怒貼跪）（貼）告啞娘，聽簡說起，許陳三一身受氣。 （旦）你說不知，又知陳三一身受氣。 （貼）再三分付，甲簡共娘仔說出即情意。 （旦）鬼仔，起來，陳三有乜話說無？ （貼）說娘仔袂記得當元初時。 （旦）我當元初有乜事？ （貼）啞娘井都無事？ （旦）我都無乜事。 （貼）高樓上食荔枝，掞乞伊，引惹伊人做乜？ （旦）掞著伊不？ （貼）啞娘現掞著伊。 （旦）不愛人白賊。 （貼）深懊恨，無所見，叫恁姿娘人，話說無定期。 （旦）無定期整騙伊乜？ （貼）現（見）騙伊人。 空騙伊人張盡計，費盡機。做恁厝奴婢。 （旦）只便是伊甘心情願，整誰人力伊來？ （貼）罵娘仔！ （旦）想陳三未敢罵我。 （貼）現罵啞娘。 （旦）罵我乜？ （貼）許簡不敢呾。 （旦）罵便是陳三罵我，整是你罵我？罔說。 （貼）罵娘仔怯心肝，懊行止，全無半點可憐伊。 （旦）只賊奴，乜大膽都敢罵我。 （貼）伊人句乜樣著切。 （旦）做★(左人右再)切？ （貼）說伊讀書，有好文章無志氣。 （旦）鬼仔你即呆，乞伊人罵你，因乜不應伊：你好文章不去求官應舉，卜來阮厝為奴？ （貼）簡也障去問伊。 （旦）伊做★(左人右再)應你？ （貼）叫伊那卜肯求官，官那在荷包內。 （旦）我夭信？ （貼）說伊卜求官都容易，那貪共娘仔愛結成連理。 （旦）好空思想伊。 （貼）伊即甘心捧盆水，掃廳邊。忍除志氣，受恁一嘴（口）苦氣。 （旦）我想起來，即是怨陳三。 （貼）勸娘仔你莫怨伊。伊怨恁辜負（孤負）伊人青春年紀（已）。 （旦）鬼仔，你罔呾，我不聽。 （貼）也耽擱（各）恁獨自。 （旦）我袂曉得飼你即大，不同我心，專共（★(左人右再）別人送書。手伸來，我捶（搥）除。 （貼）啞娘，莫捶（搥），簡手留卜捧湯乞啞娘你洗面。 （旦）不用你捧，伸來，我捶（搥）除。 （貼）今是不用簡，今有人了，既是卜捶（搥）簡手，待簡去叫陳三來，一齊乞啞娘捶（搥）。 （旦）我捶（搥）陳三手乜事？ （貼）送書人手都著捶（搥），寫書人手句著捶（搥）。 （旦）你只賊婢成精了，讓你也罷。 （貼）簡今即知陳三是好人。 （旦）你因乜知？ （貼）昨暮日有一家人來尋（★(上毛下火)）伊。 （旦）伊家人值來？ （貼）說跟伊兄廣南做（佐）運使來。 （旦）見伊便做★(左人右再)樣？ （貼）見伊乜樣啼切，再三勸甲伊返去，說伊厝乜樣富貴，豈無玉顏之女共伊匹配，何卜做障般勾當？ （旦）陳三乜話應伊？ （貼）陳三都無話應，那目滓流。 （旦）我句未信。 （貼）啞娘不信，夭跪伊，夭叫伊三爹，夭討銀乞伊使。 （旦）我夭信乜？ （貼）不信，夭句一塊即大乞簡，在只。 （旦）你共伊人送書，亦值一塊銀喝大。 （介）我明知陳三是好人仔兒，今有乜思量？ （貼）啞娘都無思量，甲簡卜乜思量？ （旦）鬼仔，起爐發火都是你。 （貼）簡聽見許老人講古，說崔氏鶯鶯共張珙（拱）在西廂下相見，後來姻緣成就，啞娘學伊畏★(左人右再)年？ （旦）我愛學伊，那畏不親像伊。 （貼）啞娘那卜學伊，都不可強伊。 只姻緣學卜崔氏鶯鶯共張珙（拱） 西廂記 。 （旦）你障說也是理，我共你在只心頭，且莫露機。 （貼）簡★(左人右再)敢說？ （旦）是我當初親看見，我一心恐畏只人不是。 （貼）正是只人。 （旦）恐畏世上人相親像，又畏人乘機來假意。 （貼）今卜做★(左人右再)（在）思量？ （旦）不免再叫來問伊，試探伊人話刺。 （貼）那卜是年？ （旦）成就只姻緣也未遲。 陳三今在值？ （貼）陳三在後花軒內，只拙久頭不梳、飯不食，是乜★(上毛下火)人可憐？ （旦）去叫來，我罵一頓乞伊。 （貼）今聽簡勸莫罵伊。 （旦）亦罷，聽你勸，去叫來我問伊。 （貼）簡去叫伊過來。陳三，啞娘叫你。 【縷縷金】 （生）聽見叫，心帶疑，未知五娘仔有乜事志？手舉★(??舉)芒掃帚，近前問伊，使我也知（在）伊心意。水潑落地，難收得起。 娘仔有乜鈞旨？ （旦）陳三，你好弄膽！ （生）小人做乜敢弄膽？ （旦）你畫鶯柳使益春提來戲弄我，可是啞不？ （生）是。 【醉扶歸】 （旦）陳三，陳三你不是所行，寫詩，寫詩戲弄我，乜大膽。 （生）小人那畫一鶯柳，便是戲弄娘仔，娘仔你做其事可記得？ （旦）我都無乜事。 （生）娘仔你想看年！ （旦）阮袂想，我亦袂曉得。將只鶯柳提來去度阮爹媽，你便是奴敗主，該乜罪？ （生啼）（旦）不愛人假切。我曉得了，你驚畏我去報阮爹媽，你著驚啼。 （生）小人不是著驚啼。 （旦）不，做乜事？ （生）那切今旦因乜只處乞人聲聲叫賊奴。 （旦）叫賊奴句切，句是大敬你，即叫你。 （生）小人受娘仔指教乜多了。 （旦）你常說富貴人厝仔，因乜卜學只所行？不去勤讀書詩，不去應舉求名。 （生）小人卜應舉求官有乜惡？ （旦）不愛人大話。 （生）小人不大話。 （旦）你厝住泉州，因乜來阮潮州城？ 【皂羅袍】 （生）娘仔你且聽說起，因送我哥嫂廣南城市。 （旦）送你哥嫂廣南去做乜？ （生）送哥嫂廣南做官。 （旦）做乜官？ （生）做運使。 （旦）你兄那卜做運使，向說你便是叔爹了。 （生）我便是三爹。 （旦）惡見一個（個）三爹共人磨鏡。你許白賊話共人說，倒無人信。 （生）送我兄來到娘仔貴城，幸遇元宵，小人出街看燈。 無端燈下見娘仔。 （旦）你夭出街看燈，好樂然，你見我不年？ （生）小人親見娘仔。 （旦）不愛人白賊。 （生）小人見娘仔花容玉貌，一見失了精神。 （旦）好井話。 （生）送我哥嫂到任，冤家冥日著你割吊。就返來，便是六月。 （旦）你許白賊話輕聲說，人了聽見。 （生）一日騎馬上街市。 （旦）你夭騎馬？ （生）娘仔你都不見。 （旦）你那卜有馬通騎，也是租來的（個）。 （生）娘仔，你可記得樓上食荔枝時？ （旦）我六月常在樓上食荔枝。 （生）娘仔你做出一件事，可記得袂？ （旦）阮記都無乜事。 （生）夭共益春。 （旦）阮連益春都袂記得除。 （生）既是袂記得，待小人共你說。 （旦）你記得便說。 （生）你掞落荔枝，乞阮為記。 （旦）掞著你不？ （生）現掞著小人，夭箭！ （旦）不愛人白賊。 （生）我估（怙）你有真心，即來做恁厝奴婢。 （旦）陳三，你創景，生入人告罪。 （生）阮都不創景入別人。 你既然那卜虧心荔枝，我現收在只。 只荔枝是娘仔你的（個）不？ （旦）只荔枝果必會相見。 六月，六月值處人無荔枝？ （生）娘仔你無行止說話。 （拾介）不是，還小人。 （旦）秋啞，愛搶，搶去不好？ 未知只物是不是？ （生）（拾介）娘仔聲聲句句說不是，看伊做（佐）乜？（拾） （旦）荔枝便借人看，向希罕，搶去乜事？ （生）既（見）不是，看伊乜事？ （旦）今是了，各借阮看一下。 （生）在只手袖內，愛看伸手來提去看。 （旦）我苦，未是藥。 （生）未是藥便莫看。 （旦）前日有一人騎馬遊街市。 （生）娘仔可認得袂？ （旦）我袂認得。 （生）娘仔好目頭高。 （旦）是我錯手掞荔枝。 （生）好大錯手，有采掞著小人，卜掞著阮簡仔，也剝食了。 （旦）不是錯手，井故意掞你？ （生）天，只荔枝不是娘仔親手掞度阮，天就見責阮。 （旦）值人逆你？向苦咒誓。 （生）娘仔你棄人。 （旦）過去事志，誰人卜記？ （生）娘仔你不記，小人惓惓記在心頭。 （旦）既然那卜是你，馬今在值（值在）？ （生）是我，是我有馬袂做得主。 （旦）因乜有馬袂做得主？ （生）送乞，送乞磨鏡師父。 （旦）馬不騎，送乞磨鏡師父乜事？ （生）學伊手藝來見你。 （旦）你向苦見卜阮做乜？ （生）只望卜共娘仔你結成夫婦。 （旦）結你骨頭夫婦。 （生）著你辱罵，不敢應一半句。 （旦拖介生白）跋（拔）著小人，都未見好。 （旦）跋（拔）你骨頭不碎。 （生拖旦介）跋（拔）著我，你著死。 （生）叫未成。 （旦）食大丈夫漢，厝不掃，假虔啼。 （生）今天甲我掃厝？ （旦）不井讓你，只時無閒飯通乞人食。 （生）娘仔既有尊命，敢不掃。 （旦）緊掃，不愛人延。 （生）就掃。 （旦）一掃帚按向舉那怙應嘴（口）。 （生）井掃厝也有師父？ （旦接掃介）無師父，我掃你看，句可好看你。 （生）向說，我掃乞你看。 （旦）今免你掃。 （生）娘仔又無乞我掃。 （旦）掃了辛苦成病，無人通伏事你。 （生）感謝娘仔痛疼。你念著荔枝再莫猶豫。 （旦）陳三你莫弄膽，踏著我腳你著死。 （生）我那死，你也著死。 （旦）乞伊人障說，乜話通應伊？ （生）今問娘仔乞一開處。 （旦）泉州人識禮，亂亂唱喏。 （生牽介旦）陳三膽大，放手。 （生）今夭甘放？ （旦）不放我叫。 （旦）叫陳。 （生）娘仔你叫，小人就跪。 （生跪）（旦）恁起來，阮不叫。你丈夫人膝下有黃金，向跪阮姿娘人乜事？ （生）禮下於人，必有所求。 （旦）放手。 （生）今著叫一聲三哥即放。 （旦）放，阮叫。 （生）你騙我。 （旦）三哥，今放。 （生）今著叫小人一聲官人即放。 （旦）你只一人上心，不是叫你三哥，大且喜了，又卜甲人叫你做官人。 （生）緊叫官人。 （旦）害，陳三，人來。 （生走）（生）娘仔都那是騙小人。 姻緣斷約卜值時，今問娘仔乞一古記。 （旦）三哥你也莫得見淺。 （生）君子之求，聽人所願。 （旦）我看你都那卜打硬。 （生）小人做乜敢打硬？ （介）問娘仔乞一金言。 （旦）我只處心驚腳手痹（庇）。 （生）娘仔向虛驚做乜？ （旦）啞媽得知，我★(左人右再)得死。 （生）娘仔那死，小人就同娘仔你死。 （旦）阮便是怨切身命死，恁死正為乜？ （生）我千鄉萬里來到只，望共娘仔結成夫妻，娘仔你那死，卜我命做乜？不如共娘仔同死。 （旦）★(左人右再)當得障般好嘴（口）。 （旦）三哥，阮出來久長了，恐阮啞媽尋我不見，阮卜入去。 （生）娘仔共小人斷約一聲，乞你入去。 （旦）待阮去即來。 （生）既障說，乞你過去。 （旦）不愛人假忠厚。 （生）娘仔共小人斷約一聲。 （旦）恁乞阮過去，阮啟（踝）你一深啟（踝）。 （生）娘仔，你那一處，小人唱你一喏。 （生攔）乜物向生，急死人！ （生）障變面，即是袂得過去。 （旦）阮不變面，恁行開，乞阮過，阮惜惜你。 （生）娘仔你帶只處，我句惜惜你。 （旦）值人卜你惜，一人倒＜到＞不聽人嘴（口）。 （生）你都不聽阮呾。 （旦）聽伊人障般言語，甲我★(左人右再)當得起？ 三哥，阮一卜力親情放乞恁是年。 那畏恁家後有親，到許時誤阮身無依倚。 （生）娘仔，你疑小人家後有親，就共娘仔咒誓。 （旦）只誓惡咒。 （生）就詛（咀）。 （旦）你詛。 （生）天，必卿家後若有親， （旦）且慢，父也是親，母也是親，你咒誓著咒乞伊明白。 （生）必卿家後若有妻小，日後耽誤娘仔，天你譴責必卿早死。 （旦）三哥請起，一人倒＜到＞愛咒誓。 （生）小人受盡娘仔你氣。 【水車歌】 （旦）你障說我只心肝都痛，阮★(左人右再)甘負恁人情。你★(左人右再)曉得我心頭思想。 （生白）娘仔你今想到了。 （旦）為君發業，心悶（無）惆悵。 （生）娘仔共阮斷約一聲。 （旦）呾不出嘴（口），八死不少。 （生）人情意好，畏乜八死？ （旦）人情初相識，終無怨恨心。 咱今相惜在只心內，何用卜斷約？ （生）既不共小人斷約，入去罷。 （旦）你莫掛意，阮有真心，力恁丈夫人心腹句袂著。 （生）我堅心為你失了千志，你想我是一辜恩負義？ （旦）君你言語句句卜記。共君斷約。 （生）斷約值時？ （旦）須等待今冥三更時。 （生）值人留門？ （旦）恁留門。 （生）娘仔不來是年？ （旦）三哥，再不負約。 若還不來，頭上是天。 （生）若負小人年？ （旦）我亦咒誓你聽。 若還負君，促命早先死。 （生）感謝娘仔真有人情。 （旦）阮明知恁假意學磨鏡來阮厝行。 （生）娘仔卜知，夭罵阮做乜？ （旦）我罵你是瞞阮媽共爹。君你今障說，我只心肝越痛。 （生）林厝親情今★(左人右再)樣？ （旦）懊恨丁古林大，早死無命。 （生）娘仔★(左人右再)捨得罵伊？ （旦）每日催親（推親），我幾（己）轉為伊險送性命。 （余文）我勸你心把定，一世不負君人情，心神把定莫著驚。 （生）娘仔既（見）你真心，討一件物見阮做表記。 （旦）三哥既愛表記，阮一時無物，權力只御羅手帕乞恁為記。 （生）娘仔，只個（個）可輕。 （旦）三哥你真箇好笑，你不見古人說：物輕人意重。恁既愛重物，只桌哥來不好？ （生）既障說，當人不當物，小人就收去。娘仔，今冥大志不通相耽誤。 （旦）三哥不必致疑。 （白）早力荔枝為定期，今將御羅為表記。 在天願為比翼鳥，在地願成連理枝。