千金譜 · 《千金譜》之一

字是隨身寶，財是國家珍，一字值千金，千金難買聖賢心，隸首作算用苦心，倉頡制字值千金。勸人讀書著認字，看得來寫得去，百般貨物都有字，件件貨物都須記。記得物件寫得來，便是伶俐不痴呆。百般生理多頭路，也有坐店共開鋪，也有赴墟排街路，也有講古拆字數，也有牽罟共落廓。日出而作，日入而息，不識不知，舜帝之則。后稷教民稼穡，也著種，也著播，耕作著認路，田園著照顧，也卜食，也卜租，毋通拋荒成草埔破桶著箍，破鼎著補，莫嫖莫賭，勤儉有補所。謹作著謹收，守望相助是農儔，早仔粟代先收，員粒、埔占共清油。烏占、白殼軟兼滑，芒花、青稞、鵝卵秫，豆、麻、麥、黍各件出，豆芽、豆菜皆著郁。吃甘蔗，前頭入後頭出，排塗豆，卷螺風透拂拂，囡仔豬頭亂亂笏，春夏秋冬，四時勤勞，毋通想風騷，毋通想佚陶。父母著孝順，兄弟著合和，井內無水著來淘，水內有魚著下笱，會莊掠賊著拍鑼，壯丁著盡出，竹篙斗菜刀，藤牌、鳥銃、鉤鐮、撻刀、弓箭、鐵耙、柴槌、干戈。家內飼豬著豬槽，泔著多，潘著濁；新豬母，老豬哥；豬胚照路行，豬囝濫糝趖，赤牛哥，水牛母，羊母羊囝滿山趖；鳥、鴨、雞、鵝；閹雞趁鳳飛，雞囝綴雞母。大厝九包五，三落百二門，糖間兼粟倉，大?兼花園；池台水閣，塗樓兼石坊；三餐五味，四撇一碗湯；玳珼貓，守粟倉，金獅狗，守後門；田園千萬甲，公館百二莊，奴才掃地煎茶湯；查某干捶腰骨，拌眠床。一妻一妾爻閣嫷，就勸丈夫做生理，造起橫洋十三隻，當店兼油車，郊行斗夥計；上天津、廣東、蘇州買狐絲。看見蘇州婆真文理，十八廿二少年時，紅喙唇，白喙齒，穿帶有排止，金手環，玉手指，也乖巧，也伶俐；琴棋書畫盡都是；緞被紗帳簾，牙床上，芳花味，一身白如面，兩奶軟似綿，桃花面，點胭脂，紅奶兜(斗)，掛錦墘，紅綾鞋，金充(聰)邊，飲酒吟詩，相牽看戲，搬來又搬去，交膚貼肉同床共枕。有生理，一位夥計來叫伊，看見兩人眠未起，說叫貨物買全備，若毋轉鄉里，恐驚(畏)生理隨伊去陷眠聽見就爬起，目屎糊目墘，是我一時真呆痴，看見蘇州婆，心肝迷迷；夥計就勸伊，朝來蘇州做生理，敢來放蕩破了錢；蘇州婆，講話就應伊，青春少年時，不嫖不樂是卜年?聽汝講，都也是，少年揣幾時。白了工，也了錢，連嫖四月日，錢銀了去兩萬四，收拾行李卜轉去就叫蘇州婆，來相辭，生理若猶有趁錢，明年再來總未遲；蘇州婆目屎流，目屎滴，毋甘拆分離，夥計就勸伊，蘇州婆卜汝錢咬薑母擦目墘假有心，假有意，目屎淚淋漓，騙汝一隻戇大豬；了錢無要緊，無生瘡，是汝造化是。上行點貨味，橫洋十三隻，買甲滿滿是，海面生理，望天保庇；順風相送，緊赴過年；滿街做戲，也有賀壽，也有團圓；狐絲客大本錢，跋繳人看見，思想伊，有人招伊「硩輾寶」，有人招伊「釣白魚」，有人招伊「骰九叫」，有人招伊「硩蓋笑」。狐絲客毋敢聽，雨傘舉起做伊行。直到廈門泉州城；郊行家長來探聽，看見相牽手，做伙行；問伊貨物是乜件?一一念來聽；就講橫洋十三隻，講著汝總驚，狐絲百二擔，人參廿八車；鴉片塗兩隻半；真珠、財寶七十二萬件，綢緞、布疋下兩隻。粗磁、幼碟、器具、共七隻。紙料、食物千千萬萬件。敢問家長，當今生理，啥乜會行時?就說染房布生理，好歹長短中人意，金絨工夫染，眉梭兼軟池，干烏兼踏洗，半烏紗頭淺，襖頭丹井是白身；月白天藍冬瓜淺，毯條玷褥無比止；棉績被透清棉；膠州帽滾絨墘；茄紋席掛萬字。麻葛蕉苧是粗布，惟有大田是幼糊；漳紗、狐紗、青絲羅，頂戴鞋襪，靴袍帽海南葛，白紡苧，蘇白扇、草蒲鞋，銅薰吹、金充(聰)袋，蘇腰帶、紅櫓笠，包袱皮、花藜藜，貢緞、繭綢兼縐紗春綢六加素，紫薇裘、嗶嘰褲；淺跤巾，烏頭布、紅嗶吱、多囉呢，程香袍、羅漢衣。