荔鏡記 · 第四十二出 靈山說誓

【粉蝶兒】 （末判淨鬼）親領娘娘敕旨，不敢違遲。神通變化無比，威風顯聖無偏，金爐內香菸不離。 小神不是別神，便是靈山廟娘娘殿前著法判官便是。娘娘出去赴會未返，恐畏遠近弟子來廟燒香下咒＜紙＞，須著速扮威儀。 （淨）正是展起神通光一點，免得迷人暗處行。 （生旦貼上） 【婁婁金】 行來到靈山廟口，判官小鬼把在門兜。廟前生草，無人行到。君恁先行阮隨後，三人入廟內，燒香告投，燒香告投。 （生）請娘仔燒香。 （旦）官人燒香便是。 （生）弟子是泉州人民，在此潮州經過。恐畏前去路途不平，善願投娘娘保庇。 （生旦貼拜） 【蠻牌令】 一齊告神祇，燒香獻紙錢。保庇阮三人走卜身離。乞靈聖暗相扶持，到泉州心即歡喜。許時來謝神祇，娘娘爾聖廟，阮來全新各起。 （生）燒香了，做緊起身。 （旦）官人， 姻緣說卜盡，恁丈夫人口說無憑，莫待去到你厝虧心。 益春， 到只處誰人是親。 （貼）官人，阮娘仔來到只處，即憶著厝。 （生）娘仔到只其段即猶豫，娘仔既不信，待小人就娘娘面前咒誓。 （旦）你咒。 （生）有神明在阮做證明，到我厝若虧心，娘娘你報應譴責伯卿。 【尾聲】 （旦）君恁有心阮有情，到其段說無盡，三人一齊行做緊。 全望娘娘相推排，夫妻一對早和諧。 （下）（末判淨鬼）好生叵耐，三人空嘴（口）哺舌（步舌）來下咒＜紙＞，只一丈夫便是泉州人氏，只諸娘是潮州人，二人是前世夫妻。今走來咱（懶）只廟內下咒＜紙＞，後去句有一大難，即會夫妻團圓。咱（恁）今迷乞伊走不離，乞人力著。 （下白）差遣陰兵去迷伊，乞人力去到官司。 路遇伊兄都堂返，判斷雙人得團圓。