二荷花史 · 卷三
湘廟卜婚
想去想來唔覺久，唔想漏盡鐘鳴已曉天。一見雪桂起來伸下懶，向生時就細開言：「做乜秀才夜夜都唔睡？寧可白日疲疲又去眠。」書生見得難回答，空系大氣抽來望碧天，雪桂實知人意思，佢就微微咁笑又開言：「我想秀才自到花溪去，踏青迴轉在窗前，嗰時你就唔歡喜。你就日夜耽愁少自然。人話湘妃娘媽多靈聖，忒多人去把香拈。你今若有難分處，唔好走去祈求一紙簽？」
生見家童言共語，就時觸起在心田：細想與嬌相識處，系在花溪古廟前。湘君既系多靈感，就該去問我姻緣，睇我幾時正得如心意，免得迷迷空度日如年。因就開聲呼雪桂，叫他跟尾去求籤。
心既急，步還忙，一程來到廟之旁，入到廟中來一看，只見香菸如霧燭輝煌。生即向神忙下拜，復從階下啟言章：「小子名蓮身姓白，近城家系住東方，事因嗰日清明節，來游此地踏春陽，忽於隔水花亭上，得遇如花兩女娘：一喚麗荷裴是姓，—為何氏映荷娘，國色果然塵世少，入眼平生僅一雙，弟子因之心妄憶，欲求為配結鸞凰，唔知天上姻緣薄，赤繩曾否系三郎？弟子敬來求指示，伏惟明白賜端詳。」祝完便把簽筒叩，一枝就跌在身旁。檢起就將簽語睇，唔想讀來特緊意茫茫。
婚姻簽
沼邊思得藕，覓取休停手；
若要見蓮時，須逢四十九。
生閱畢，轉情牽，叫聲菩薩這靈簽，覓取既雲休住手，此中想系有些緣。做乜說個「須逄四十九」，許我方能得見蓮。
此句睇來真費解，偈頭真系惡參詮。幾度思量唔解得，謝神只得就迴旋。
歸窗遂即將簽語，閒行偷算在花前，忽然只覺皮毛冷，思尋就枕暫安眠，誰知昨到花前去，感來寒氣已相淹，遂即染成為一症，沉迷幾度覺煩連，自是病敲成半月，紅樓人總不知天。
假託傳詩
一日二嬌當曉起，大家同倚鏡台前，巧樣梳成樓上髻，真系滿面新妝亦自憐。映姐便從樓下去，尋花轉到小亭前。
只見素馨白滿朝來樹，粒粒如珠帶露圓。繞欄摘得香盈掬，佢就笑把銀絲串作連，欲戴上頭還住手，唔想嬌來驚起婢凌煙，帶笑一看稱語道：「姐你風流真賽月中仙，真系艷態只應天上有，怪得人唔長為姐情牽。想起我嬌前半月，就畀一書假做麗娘言，貪圖哄嗰瘋癲鬼，等佢懵浮成夜在花園。做乜近來唔見他聲氣？我估佢好無氣死在花前。」
映娘聽語方思答，唔想麗娘時就到身邊。叫語同心：「真箇怪！做乜就唔死爛嗰瘋癲？先時嗰個紅阿嫂，揩來一幅錦雲箋，內寫『無題』詩四首，話系白生教送到我邊。叫人把佢詩來和，免得佢苦吟空白嘆長篇。我想此生真無味，做乜亂教人到我香簾？況兼這個紅阿嫂，此人平日極蛇癲。因此我地多氣惱，將詩撕碎擲花前，紅嫂見人威已作，發狂時便走迴旋。」見語映嬌忙說道：「做乜佢詩肯叫佢來傳？」凌煙偏解生疑惑：「姐你先時嗰幅箋，如今撕爛拋何處？等我尋來睇過對嬌言。」
麗姐叫人忙去取，就時尋轉共觀瞻。凌煙一見頻含笑，叫聲：「佢果系成癲，你睇綺琴著佢都吟到，又來波及我凌煙。記得大家嗰日尋詩稿！綺琴曾在佢書軒，把佢書篋來亂搜，尋來正見哩張箋。時遇蔡家公子到，故此慌忙未暇帶將旋。哩下話教紅嫂來傳遞，只怕事有蹊蹺未易言。」
聞說映娘時便道：「唔通蔡生偷了轉窗前，如今特地教紅嫂，畀佢傳將到我邊。貪圖探取消和息，等佢執來做證好瘋癲。」凌煙帶笑頻稱道：「姐罷十分估有九分然，況且白生做事機關密，做乜私情肯用此人傳？」麗姐聽言稱：「易事，你地偷閒今到佢書軒，這事若然真系佢，有乜唔該來共你相言，真假就時明白了，狐疑何在掛心田？」即忙吩咐凌煙婢，去探真情轉畫簾。
差鬟探問
鬟領命，出香房，舉止溫存見大方，正系行拖花屐尋常事，那管人家有斷腸。轉入鎖香園裡去，就打橫門悄步到西窗。躡腳就時偷眼望，只見寂無人影在書房。滿徑落花全不掃，避人啼鳥踏枝忙。潛身便到生居處，只話細將消息問三郎。
唔想推窗望入人唔見，只見雪桂從中嘆氣長。手揩一幅鮫綃畫，叫言：「此系害人王，我的秀才因為你，哩下病成就要『烏之將』，做乜重叫我來揩轉去？唔通秀才真要為她亡！」凌煙聽得心驚異，只話偷從暗處把人■〈目莊〉。
唔想雪桂忽然身一轉，就時睇著叫聲忙：「噯呀！阿姊乜風吹你到？等我趁時說過姊知詳。我地秀才因你多嬌姐，如今病得咁心傷。前月接回家裡去，沉迷一發覺難當。唔系哭時就系笑，顛顛倒倒得人狂。算來今有十多日，硬就冇人敢去說知娘。」凌煙時就稱言道：「做乜疾牙病得咁狼■〈犭康〉？唔好請個太醫來下藥，等佢調和身體就還常。」雪桂答言：「虧你話，秀才一日何曾脫藥湯？獨系醫官唔識相思脈，內外空傳佢大方。哩下所求阿姊你，回歸話報兩嬌娘。睇佢有乜方和法，或者能醫我地秀才郎。」凌煙見語微微笑，就話：「這病原來無乜藥方。古道相思無藥治，虧人空自為花亡。」轉聲遂又將言問：「你揩個卷乜災殃？」雪桂答聲：「休講佢，哩紙東西就系活閻王。」因此展開畀佢看，只見凌煙頻叫退財忙：「做乜畀我大家形共影，寫做丹青畫一張？怪得我地精神都減了，誰知總在哩頭藏。此圖果系誰人寫？得知人系咁容光。」雪桂笑云：「青友畫，系佢嗰枝筆仔寫你眾仙娘。佢自嗰日踏青歸屋後，就著我地老爺監了在書房。唔能出得尋酥食，故此佢就畫出丹青畫哩張。日夜畀來偷拜懺，唔止觀音咁樣奉承娘。今為病敲回屋去，唔曾帶佢轉家堂，哩下叫我特來書櫃裡，偷偷取出帶回窗，等佢時常來睇下，當為嬌在佢身旁。死時就畀來陪葬，免得陰間無伴見悽惶。我想秀才真懵了，唔知點得佢安康。此畫若然揩轉去，只怕又添一帖藥來嘗。不如畀火來焚罷！免得秀才睇著又悲傷。」
凌煙時就回言道：「算來唔在火焚將，正該畀我揩回去，等我有些話柄好商量。」雪桂聞言稱：「系呀！就畀姐你帶佢轉香房。」文氣滔滔還又說：「阿姐你其間之際莫遺忘，正系性命在乎嬌手上，便中勞步到花旁。」
得情歸報
凌煙點首忙移步，就入紅閨見姑娘。麗嬌時見她迴轉，頻頻笑語就飛香：「你今出到書齋去，可曾睇著這魔王？這事可曾明白否？可曾還有乜言章？」
凌煙見得佳人問，佢就緊蹙眉頭覺慘傷。叫聲：「先那傳書事，姐罷果然唔系白三郎。婢今出到書齋去，聞生抱病已回鄉。空系得逢他雪桂，來收書籍轉家堂。我就即時將佢問，佢話：『秀才病得極心傷，今已數來將半月，唔想日深一日轉非常。迷迷懵懵顛還倒，時時含著淚汪江。有時就系嘻嘻笑，共起呼嬌呼姐又呼娘。哩下一家大小都寒了，都話恐佢殘命難挸哩月長。』婢時問佢：『因何故？病來致到咁狼■〈犭康〉？』佢話：『總因一幅鮫綃畫，內頭畫有幾嬌娘，掛來該處常偷拜，引得陰司駙馬到纏郎。』我見佢言知趣事，因而問取看端詳。佢就細將書櫃忙開鎖，取出美人畫一張。接起展開忙一看，唔想睇來果系趣非常。我因奪了它迴轉，姐哪請開一看就知詳。」
遂即遞將嬌展看，只見綺琴時就叫聲忙：「嗄！你睇佢倚台對鏡來伸懶，唔系我地多嬌小姐映荷娘？噯呀！嗰個企在側邊還又怪，唔系麗娘姐姐咁容光？死嘮！你睇捲簾人就如同我。嗄！你睇凌煙似賽探花娘。嗰■〈口匽〉花草描來都好樣，系誰畫得咁災殃！」兩嬌聽說心如醉，空系默對春圖意各忙。你睇我的我睇你，唔知心上點商量。忽見麗娘抽個氣，行來輕倚碧紗窗。叫聲：「映姐同心呀！我想此生真箇系魔王。今若病來成咁樣，只怕風聲露出外頭揚。」映姐接言稱：「系嘮！你話想起教人點主張？世間若有神醫在，我就願出金錢買藥方，送與那人來食好，免得出乖露醜咁張揚。」
私論藥方
凌煙時聽佳人語，佢就笑呼：「賢姐未知詳，姐果有心求妙藥，唔在尋醫問外廂，唔在遠尋不死草，亦唔在求仙借用返魂香，唔在人參來益氣，逐寒唔在用於姜，唔在當歸來補血，防風唔在用檳榔，唔在化痰尋貝母，健脾唔在用飴糖，唔在定魂求琥珀，祛邪唔用鬱金香，唔在止驚求遠志，延年唔在乜昌陽。若然真話來醫佢，此生起步就調良。」麗姐聽語微含笑，就話：「凌煙你這懵天娘，藥草千般都不用，唔通秘傳你有乜奇方？」凌煙笑道：「差唔大，只系要求兩位姐紅妝，曾聞我地阿婆話，如今尚記在心腸。但凡人染相思病，醫治從來無藥方。只就從佢嗰個相思個，求她著睡汗衣裳，取去就時煎水飲，真系好過仙人活命湯，我想白生病亦唔因乜，哩下嬌嬌若要佢身康，唔好畀件汗衫佢煮水，或者飲罷病亦就離床。」映姐聽言稱：「大話，有乜汗衫醫得佢災殃？若還真正能醫得，我就挽我同心姐麗娘，求取貼身衫一領，就時送過佢煎湯。」
裴小姐，聽言陳，佢就叫語：「同心你盡新。知道你地身中無嗰件，定要生借方才畀得人。」佢話得映嬌無語答，感得挑笑梅香有綺琴。吟吟微笑頻稱說：「姐罷兩家唔在咁頻淪，不若一個就將衫一領，揩來送與秀才身，等佢煎水就時來食好，真系修心好過念經文。」凌煙就話：「綺琴你，此說分明合我心。我想嬌今既肯為菩薩，做乜重惜一件衣衫不救人？哩下所貪佢病登時好，只系一人一件極平勻。假如醫得沉疴起，亦就免致風傳出外聞。」
聽語二嬌方欲答，綺琴呼道錦爺臨。唬得大家忙閉口，空系如痴如醉各沉吟。
訪玉回窗
停語其言閨內事，西樓且道紫娘身。聞生染得相思病，佢就懷人無日不關心。屈指俄驚將半月，生死存亡總未聞。
只話過門去候多情病，又妨佢格老嚴親。故此避嫌唔敢輕相問，空系日日愁思對白雲。
一朝倚鏡方愁坐，只見一個瘦損懨懨客到臨。紫玉失驚忙一看，睇來就系白生身。佢就笑語頻頻呼：「命呀！做乜郎你病得這般深？你系幾時方好了？硬就教人無日不操心。」白生抖氣方回道：「噯呀！妹罷幾乎唔得見嬌身，如今好似重生過，坐下方才對你陳。」紫娘取椅忙教坐，佢就扶著肩來又問雲。叫聲：「你那多嬌姐，亦知君病定唔曾？你這病根因甚起？估系相思因為佢勞神。」白生微笑徐聲答：「妹罷真系無益相思易壞人，嗰日病來都懵了，你話何難就去見閻君？若唔得我凌煙姐，我想十條命亦當虛文。感謝佢地施巧計，就共映娘求到汗衣襟。偷畀我地來煮水，飲敲才得醒神魂。哩下僅可幾朝身覺好，唔想惜花又動往時心。如今正要回書館，所以便來講過姐知聞。」說完遂欲將身起，紫娘時又把言陳：「你今若轉書房去，我想月下花前定遂心。只系身體自家多保重，莫來過度又傷神。君今病得多消減，唔比前時一半分。莫話我地言詞多粗率，須知這句是情深。」
按語白生稱：「領教！」相辭時就慢抽身。
別了紫玉返裴府，只見叔錦相迎笑語頻：「哥罷你地病來成咁久，畀我草窗閒卻近來文。哩下哥你好敲來我館，只覺四圍花木亦精神。」白生笑謂：「休言重，微恙何勞掛弟心？渴想雖耽司馬病，懷人我亦慣消魂。」相攜便入書齋去，就將斷簡殘編又細論。唔想「者也之乎」非艷句，顏曾思孟是賢人，睇來只覺難消遣，空系想著來如春夢去如雲。
主婢私談
白生自從回窗後，人在紅閨亦已聞，只話安排心事傳幽客，又怕泄漏春光與外人。
一日麗娘心覺悶，佢就睡來聊且遣消魂。凌煙便曉人心事，低聲因共映娘陳：「麗娘日日惟思睡，只覺粉消香冷好愁人。就系姐你花容近日多消瘦，真系減卻秋波一半神。唔知姐你因何故？硬就大家都系咁消魂。我想白生為姐耽愁病，如今正得稍精神。哩下堅意若還唔睬佢，只怕為姐傷情病又侵，誤佢做個相思鬼，問我嬌娘點樣得安心？況且女慕男才從古道，唔信鍾情我地獨非人。姐罷誰家明月能離夜？何處東風不嫁春？鴛鳥水邊交頸宿，女蘿絲附木瓜身。我想佳人若系無才子，虛度韶光在世塵。」
映娘時見凌煙語，佢就回頭一看麗娘身。只見貪睡海棠猶未醒，輕輕因就把言陳：「你話客館有人長抱病，怕佢唔能消得幾黃昏，誰想閨中亦有人耽悶，只系半句難將說與人。況又未知麗姐心中事，所以幽恨搖搖只自禁。」凌煙笑喚：「賢嬌姐！誰知你亦夢中人。你話白生此病因何好？總系麗娘藥救佢還魂，系將一件羅衫仔，密地偷偷叫綺琴，送去白生煎水飲，果然飲了就精神。昨日綺琴同我講，佢話我個仙方實抵銀。因此奴奴才曉得，做乜嬌嬌你尚未知聞。」說來引得何嬌姐，頻呼：「假嘮」幾多勻，「怪道我件羅衫仔，昨日尋穿不見人，定繫著佢偷去為手贐，將來做藥醒痴魂。做乜姐佢專慷他人慨，畀我私衣送與人？仔細算來唔忿氣，等我又來饅慢弄她身。」就時又囑凌煙婢：「你今且莫亂談論。」
語中忽見裴嬌姐，睡來已醒海棠魂。香鬢垂肩輕坐起，笑呼：「映姐我同心，你地大家言乜事？做乜都唔說過我知聞？」映姐就將他事答，閒來共話到黃昏。正系歡笑易談惟好且，悲歌難寫是愁人。
悶懷寄詠
生自病除返到館，捱年為日又經旬。一朝悶倚欄杆坐，只見並梧飛葉到亭陰。檢曆始知秋已到，無言因又細思尋。偷偷想起逢嬌日，正系清明三月好芳春。今日夏殘秋又到，做乜事尚唔成得半分？淒淒不覺添惆悵，因就散步香園又柳陰。企來便把高樓望，唔想簾幃低垂不見人。就時欲展雙翱翅，飛上紅樓會玉人。獨系身非彩鳳難生翼，搔首尋思愈愴神。
遂又轉從芳徑去，遲遲行到一花林。近池細把殘荷看，隔苑聽來有笑音。起眼那堪看不見。搖搖只覺恨難禁。暗裡幾回愁欲絕，佢就狂歌因把古詩吟：
裙拖六幅湘江水，鬢挽巫山一段雲。
艷態只應天上有，嬌聲豈合世間聞？
胸前瑞雪燈斜照，眼底桃花酒半醺。
綠綺隔簾挑不得，春風辜負卓文君。
拋詩假約
婉轉歌來聲欲絕，只見就這一下響聲頻。唔想系雙蔞打作同心結，從空跌落在花陰。著驚轉眼忙來看，只估隔苑牆頭定有人，誰知睇去全無影，空系拂拂牆花動尚頻。遂即低頭忙檢起，又見中書數字云：
一日復一日，芙蕖已報秋；
鵲橋知有路，明夜渡牽牛。
看了這詩心想到，隔牆誰擲此來臨？莫非系我何嬌姐，抑或重系裴嬌我地姐佳人？做乜不明不白拋將到，畀我心中猜鬼又猜神。遂又將詩來細看，忽稱「是了」笑吟吟，果然系我裴嬌姐，密地拋來賜我身。唔信就睇此詩頭一句，正系借佢名兒頭字拆將臨。至於次句「芙蕖」字，又系將她荷字變成文。種種看來皆有據，然則「麗荷」二字確然真。若系「鵲橋」共起「牽牛」句，個就易解唔勞更費心。不過託言「牛」「女」佳期事，叫我明晚花前會佢身。想嬌真系夸纖巧，真系絕代聰明害死人。獨系記得嗰回曾賺怕，硬就哄人成夜在園林。
閒行忽又心思著，嗰時求有一簽雲，佢話覓藕若思蓮見日，須逢四九始如心。我見這簽如此說，當時竟就解唔能。哩下莫非咁樣將來解，若然就系忒靈神。明朝正系七月七，七而又七是雙文，七七湊成四十九，偈頭恰合這簽雲。結中既有明宵約，見蓮系有二三分。算來若到明朝晚，何妨又到佢花林！縱是所行無實事，就系聽佢樓中笑下亦甘心。
欣然遂轉芸窗去，只見斜暉時已落西林。到夜惺惺唔睡得，聽殘更漏又凌晨。起來坐對東升日，真系一刻捱來似一春，因就回天呼：「日呀！共我快些斜去當修心！等人好把牽牛學，免佢風流來笑我孤身。」愁極恰如天亦憫，羲和促御就西沉。
被哄遇生
烏落水，兔浮天，兩嬌時在繡樓前。晚來共倚紗窗望，只見一鉤新月已穿簾。綺琴答答時稱道：「人話牛郎今晚會天孫。姐罷你知烏鵲橋邊路，系誰過去個誰邊。我想佢地哩下相逢處，點得一時改作一長年？等佢二家來笑飽，免得別敲又系怨孤眠。想起天亦做人陰騭極，做乜叫佢一歲風流僅一天？」此際凌煙含著笑，就話：「你睇細蚊真系懵如仙，在人只話無陰騭，唔想天爺好處正難言。一歲亦能逢一度，尚好過一生憔悴對花眠，好過人間嫁作商人婦，長把金釵當卜錢。好過薄情對面唔相敬，好過征戍遼陽動十年，好過往往來來情不定，好過兩家心事有人傳。重有嗰種想折花枝難入手，好過佢自家長抱恨綿綿。睇起般般都好過，就系一會何妨又一年？」
二嬌時聽雙鬟語，只見映荷小姐就開言：「今夕大家無乜事，正該乞巧向天孫。熱來且把新茶試，只系有些茶泡在香簾。我想園裡近來新棗熟，更好池塘今尚有殘蓮。唔好綺琴你共凌煙去，取些果品就迴旋。」凌煙含笑回嬌語：「姐呀，實難從命到香園，人話近來有個斯文鬼，夜間就出在花園。一時著佢來拿緊，點得脫身回見姐妝前？」映娘見說呼裴姐，笑語同心聽我言：「姐你平日自稱唔怕黑，有乜自己如今敢出園？若系敢時我就同嬌賭，我就願送金釵當步錢；若這金釵嬌不愛，我就賭做梅香使十年。」麗姐從來多好勝，就話：「同心你果系真言？等我自己就從園裡去，取到果子轉香簾，定要贏倒你來為使喚，嗰時我正得心甜。」語畢就時忙舉步，下樓獨自到香園。
啟扉轉入池邊去，只話取些果子就迴旋。唔想玉手伸開來去摘，一人從後忽扶肩，佢就叫句：「麗荷嬌小姐，你地信實如今果異前。」麗娘疾聽魂飄蕩，唬暈幾跌在池邊。佢忙又把嬌扶住，低聲忙又細稱言，笑呼：「小姐休驚怕，我就系你青友憐香個白蓮。」麗娘聽得羞還怯，就話：「死呀！咁夜誰教你到園？」生云：「就系嬌叫我，故此特來參見姐妝前。」麗姐聽言知怪事，含羞就欲走迴旋。生忙截住稱言道：「姐罷既來何苦又心堅，姐若當初真見棄，錦字唔當哄白蓮，唔該偷把芙蔞結，拋我擲我在花前。哩下做乜故意又將人閃避，姐罷問你蔞結書來字怎言？」
此際麗娘聞此語，只覺嬌羞無限可人憐。情知系中何嬌計，哄我相賭出花園。尋思無路身難脫，佢就開聲頻喚婢凌煙。唔想兩鬟先奉何嬌命，久已藏兵暗在園。故此聞叫一聲忙就出，齊齊行近到嬌前。
麗娘時見丫鬟到，佢就低著香雲便出園。生時只話跟嬌去，又著綺琴攔住在頭先，叫聲：「你嗰長袍賊，做乜咁夜偷花到我園？誰知硬著人執到，等我將來解你到官前。」凌煙低喝：「休多氣！莫來裝懵講閒言，哩下敢請秀才迴轉罷，須知李下共瓜田。」生聽婢言深作揖：「妹罷於今專望你哀憐，想我學生今夜情和事，只系要娘方便為周旋。」凌煙聽得生言語，嗰就遙指紅樓對客言：「嗰頭我估全無路，致此漁郎難去問桃源，平時你亦唔多懵，做乜尚來求計向凌煙？」白生聞說稱「蒙教」，佢就潛從深處去尋仙，路入紅樓將欲到，只見二嬌又在一亭前。時似大家方坐定，白生悄步細聽言。
月下盟心
麗娘正把何嬌罵，就話：「同心你好毒心田，你將乜的芙蔞結，哄人深夜到香園？又賺我從園裡去，險些唬死在池邊。」罵得映娘頻笑道：「光施總系你蛇癲，偷我汗衫來送佢，哩下若唔酬禮點心甜。」
唔想講尚未完生已到，佢就輕輕跪在小亭邊，口呼：「兩位千金姐，乞發慈悲救白蓮！」兩姐見生如此樣，便就面面相覷總不言。心上唔知點樣好，解人真系婢凌煙，行近叫聲：「雙姐姐！做乜對面如今又默然？此生自系逢嬌後，顛倒懷人已半年。古雲才子何妨殺，若系美人但取一人憐。哩下佢既為嬌來咁樣，我嬌忍得竟安然？今宵若據奴愚見，枉系叫做才子佳人好並肩。趁早請嬌來算定，免得後來同是惜無緣。」兩嬌只覺難開口，空系低頭共倚碧欄邊。
白生遂又輕言道，「姐罷怎樣安排我白蓮，好醜請嬌開下口，等我小生死亦得心甜。」引得綺琴時亦頻稱說：「做乜你地半句總無言？你睇佢告狀一般來跪倒，我想你亦該當可佢憐。嗰日姐曾教導我，至今還記在心田：話佢斯文唔好揩來打，做乜姐就由人跪在你身邊？」
嬌見綺琴言此語，心中亦覺稍安然。欲語幾回還又止，舉頭空看婢凌煙。天生此婢真乖覺，佢就扶生起立在亭邊。
轉又叫聲：「雙姐姐！你睇月低將已一更完，我想女牛今夜還歡會，就話多情人獨不如天。哩下對面若唔明白講，只怕此舟過後水無船。不如趁早將盟定，等你大家從此好心堅。」兩嬌時亦心焦躁，開口唔知點樣言。正系唔嗔唔喜還唔答，背倚香欄共看天。
生見兩嬌情與態，知她似亦可人憐，因又向前將語道：「姐罷到此何須更默然？你睇天上佳期還咁樣，做乜白蓮唔為姐情牽？哩下生死請嬌鬚髮放，正系肉從砧上任烹煎！」欲語誰知喉哽咽，佢就搖搖飛下淚如泉。
二嬌時見生悲慘，只覺芳心都已軟如綿。映姐此時無可奈，佢就起身扶著麗娘肩。教嬌共出欄杆外，密密愉偷細共言，叫聲：「世上人如許，做乜生來有佢咁情偏？我亦如今無計策，只系求嬌你點善安全。」麗姐聽言如要答，又似芳心難竟向人言。
開口思思將欲答，唔想白生時又到跟前。笑呼：「兩位多嬌罷！你算定如今是怎樣言？有話亦該同我講，做乜捨得拋人在一邊？記得我嬌前兩月，錦書曾哄我來園，誤我染成為一病，殘喘幾乎喪九泉，若非蒙把香衫救，我想白蓮久已化為煙。歸來昨又承佳約，只話今宵一定得哀憐，誰想對面反成如陌路，唔通誤人定要死花前？」但就話得兩嬌羞欲答，低頭還又默無言。
生亦知嬌情實軟，只系幽思未易露人前，細語頻頻因又道：「姐罷何必含羞向白蓮？哩下月落已聞更報二，耽系女牛佳會亦將完。做乜姐尚含情還未吐？唔通大家空坐到明天？」唔想語中忽聽芳林外，犬聲頻吠到花前，大家時俱心驚怕，起望依依共肅然。凌煙進即乘機道：「因何犬吠咁聲喧，暗中怕系人偷聽，隔牆有耳古來傳，哩下姐若怕羞還不語，想他死亦不迴旋。婢今為姐偷思算，咁樣依還是兩全，只系各把一些憑與記，將來送佢表情堅，在姐既唔傷禮法，在生亦當姐哀憐。此際叫他回館去，唔信佢還重敢咁痴纏。」麗娘聽罷凌煙語，佢就低喚：「何嬌你怎言？」聽語映娘微一笑，就話：「世間誰見咁痴纏！」遂即密將金手釧，將來放在石欄邊。轉又細教裴小姐，玉環取下手中拈。低聲喚婢揩開去，等佢好得路頭前。
凌煙接得微微笑，佢就轉交生手細稱言：「哪，此系映姐將來盟好約，哪，此系麗娘與你定佳緣。你今就系姑爺了，哩回親密大非前。」生就接來忙揖謝，叫聲：「蒙賜喜歡天，裴姐玉環取其潔，何嬌金釧取其堅。獨系不肖如今無一物，將來可以答妝前，除非明日回窗去，有端金鏡亦堪憐，就畀佢來酬姐罷，清輝我亦取其圓。」唔想歡喜講來猶未盡，犬吠嘈嘈聲又喧。凌煙遂促生回步，就話：「姑爺今好轉書軒，有話容遲方又講，哩下夜深唔好咁流連。」白生笑謂：「凌煙妹！做乜趕人就要出花園？我望你嬌同望月，妹呀！幾時得到月身邊？今既幸依蟾兔側，耐心須聽月團圓。」聽語凌煙微笑道：「姑爺你好不知天！我姐既成金玉約，想來你已似升仙。得些好處須回首，做乜放蠻只管亂閒言？」生亦知人多回執，事非容易就溫存。佢就減下性來將就命，叫聲：「兩位姐妝前，白蓮今若回窗去，只要嬌嬌送我出花前，唔時我斷唔行了，我就死生都在姐妝前。」
嬌聽語，悶沉沉，麗娘暗裡自思尋，遂挽映荷呼二婢，大家移步便抽身。生計已窮難再說，悽然只得亦來跟。時便乘機輕趕上，從中攜住兩佳人。左則執將裴姐手，右輕扶著映娘身。二嬌遂即將言道：「奴奴不是卓文君，因君咁樣鍾情甚，故此把些品物慰君心。君今若系回窗去，好攻書史用心神，勿因我地荒廢了，時時出在此花陰。等我家君承許聘，此時方共你談心。」
依依共出園中去，佢就企住花間又說云：「姐罷哩下白蓮回去也，只系望娘專為我留心，每話今宵一會閒如水，就把小生看成作路人。」語罷便對嬌一揖，悽然遂自慢移身。誰知引得雙嬌姐，惱亂芳情已莫禁，步蓮不覺隨生後，此時欲別已唔能。行行直出花園去，佢重企來猶未忍相分。唔想守戶忽驚眠石犬，見人時又吠聲頻。咻咻幾度前還卻，真系吠得聽來唬怕人。
大家正在心忙處，凌煙又向二嬌云：「犬吠怕人驚起看，況且夜深譙鼓已三聞，請各暫辭回去罷！寬容明晚又方臨。」此時人已無能計，只著含愁各轉身，嬌回繡閣生回俯，兩地同消半夜魂。
議選東床
自系大家方一會，唔想倚花時就聽離琴。
一日綠翁裴柱史，閒中無語獨沉吟。開聲便對夫人講：你睇曾幾何時秋又臨，自從執疏干天怒，放逐歸來已兩春。隱逸得從田舍樂，子平之願遂關心，為兒既已難求媳，為女尤稱婿惡尋。何甥亦未逢佳偶，算來事事總牽人，近日求親雖不少，個種膏梁子弟得人憎。我想這個白生真系好，此事分明遂我心，況且家聲閥閱原相對，佢地祖父曾居大翰林。欲將女贅他為婿，又妨丟下外甥身，若系將甥來嫁佢，又怕我女東床惡揀人。仔細算來真惡處，如今教我怎思尋？」夫人聽得微微笑，接聲時就把言陳：「記得老爺前數月，曾稱此子系才人。欲將我女同甥女，一齊嫁與秀才身，今若心焦難擇婿，不如同你這般雲。兩個總將來嫁佢，老爺你亦免操心。況且館甥你話曾雙娶，哩下銅雀何妨住兩人。」
裴爺起用
夫婦私談猶未了，忽傳丹詔向天臨。使者到門宣聖旨，就話起復裴爺舊直臣。回朝再敕為台諫，補袞時教佐聖君。欽限即時忙就道，不容遲滯半毫分。
綠野時承天子詔，心中偷自細思云：我今復職還朝去，只系兒女全然未結親。叫我點能丟得下？不若帶將同去另思尋，京師自古稱才藪，或者兒女姻緣得遂心。就時傳命搬家眷，卜日搖裝共起身。
差鬟話別
兩姐得聞隨任事，分明攪碎別離心。意欲推辭唔共去，卻憐無計阻雙親。只得將情教侍婢，偷偷報與白生聞。凌煙遂即傳嬌命，悄過書齋去報人。唔想生時正在芸窗里，含愁亦為惜離群，兩眼似乎都腫了，叫聲：「雪桂你如今，好來打疊書和劍，共我帶恨挑將返故林。」凌煙聽語時行到，就話：「姐特差奴來別君，兩位嬌嬌多上福，別郎明日就行身。叫你不須懸念佢，且將書史用心勤。次月秋闈如得意，上京望你到相尋。等佢此時同你會，正把真心細與陳。」聽罷白生含淚答：「妹你回歸替我報佳人，先我相辭來府上，老爺意思極殷勤，話佢有些心上事，如今忙了說唔能，等我公車京到日，方才細與我談論。我想佢們似有招婚意，你回須報兩千金，你話今科我若叨嬌福，中了登時我就臨，即便不才唔中得，冬間死亦到京尋。只怕人情似紙翻翻薄，世事如棋局局新。姐別我從京上去，轉頭將我便拋沉。」凌煙時就低言道：「秀才休要過疑人，我家兩姐心如鐵，做事從來無改更。姐重反來憂到你，話你男人自古有貪心。別後恐妨情不定，道旁又戀野花春。佢就環留好約虛拋玉，釧定佳緣枉了金。叫你須全終與始，每來別舊就貪新。」生見此言忙就答：「妹罷白蓮唔系這般人，如今妹你回家去，為我傳語兩千金：晚上若然無乜事，敢勞移玉到花陰。等我好將心與意，對面揩來話報人。」凌煙帶笑輕搖手：「請娘嗰事恐唔能，繡閣如今多女客，都來送別姐行身，時刻大家相伴起，你話我嬌點得脫空臨？哩下對面不勞還說了，只系各人自表各人心。」
幽徑忽然風動竹，心驚疑是有閒人，遂即別生歸繡閣，片帆明發就行身，從今簾幃徒窺彤，自此關河易斷魂。
爭元下第
生自美人京上去，計起將將半月臨。懷人只覺無聊賴，佢就愁來惟是睡昏昏。一日拂床方去臥，只見若雲行至笑聲頻。喜色匆匆輕坐下，開言便對白生云：「不日進場科舉去，點得兩元來共大家分？」生遂徐徐稱語道：「若雲唔在懵操心，想我白蓮帶起成身病，科舉明知已不能，我不進場來壓你，解元還有乜誰人？」雲聽語，笑盈盈：「青友因何出此聲？你今若話唔科舉，置身何以答朝廷？況且尊翁教你非無意，我想顯親須要在揚名。兼又世人多眼淺，貧來未免就相輕。若繫懷珠唔肯吐，只怕蓮花說出有人聽。我亦已知君近日，懨懨長病為多情。無心來講名和利，故此匣藏慵去試青萍。誰想桂枝指日如高折，藉此求親便易成。正系知子已能忘富貴，旁人未免重科名，努力正該科舉去，等我作成錦樣美前程。」
生見若雲來苦勸，此時只著強應承。共入三場文戰畢，試官把卷細參評。一日定元來揭曉，紛紛持論在公庭。有個房師毛若采，手持一卷是《麟經》。笑喚同簾諸執事，就話：「擲此真為金石聲，光芒直欲沖霄漢，而且氣靜機圓筆又清，我想今科舍此無佳士，冠榜真堪第一名。」只見在旁又一同官道：「此卷雖然是極精，獨系《春秋》自古無元局，只怕難魁多士首傳名。不若敝房哩個《詩經》卷，將此掄元極當情。」毛公笑謂：「何拘執？所言豈是論之平？若話元局《春秋》從古少，然則取士何勞設此經？」彼此正當爭論處，只見主考徐徐便出聲：「兩君唔在頻相拗，等我為你從中處個平。都把兩經之字號，寫出將來叩太清。金甌復起來拈過，若系拈著誰先是首名。」焚香遂即當天祝，唔想拈來第一是《詩經》。此際毛公心不悅，就話：「衡文天亦少公平，此卷若然唔發解，你就中為第二亦相輕。今榜不如留下佢，等佢次科聯捷中頭名。」拆號就時開虎榜，解元就系若雲兄。生時見佢唔曾中，佢就大向蒼冥笑一聲。
卻婚被黜
誰知先那《春秋》卷，拆開便系白蓮名。毛公刻出來教子，唔想筆傳已遍五羊城。都憲蔡公時睇著，就話此子才華久著名。今閱佢文之做作，果然高貴得人驚。想我近來求女婿，聞他尚亦未親迎，正好借來做我東床選，何必還開射雀屏？遂叫媒婆來囑咐：傳言直到白家庭。鹿庵見得心思道：「求媳如今已遍城。向亦得聞他一女，生來人話幾聰明，獨系我兒性地原多僻，不若叫媒親去說他聽。」媒婆便到書房內，就話：「秀才恭喜得娉婷，蔡府老爺多拜上，佢話：『欲將()女贅豪英。』今教我送年庚到，秀才有乜不應承？」
白生聽罷媒婆語，起身含笑就開聲：「阿媽！我地生來多福薄，唔敢求親向宦庭。況且一個都堂牛咁大，門楣何用我寒丁？回歸替我須傳語，話我近已裙釵有布荊，方命自知深有罪，總系窮酸無福可消承。」媒婆睇著人推卻，滔滔時又說生聽。叫聲：「這個紅妝姐，生長今才十六齡，唔高唔矮真嬌艷，睇來世無咁精英。世上千般都識透，且又人事通疏好性情。我想秀才若得他返屋，只怕舍弟將來變作兄，一定掌房唔肯出，大家日夜無時停。如今你若辭敲菜，轉頭休想食波菱。」
白生時又嗄嗄笑，就話：「蔡娘我曉系娉婷，獨系我真無福來消受，啞使帶理他人亦敝星。阿媽如今回蔡府，善辭須為我傳聲。如有再來還復我，你話我明朝就上京，等我三元歸到屋，方才議聘到門庭。」媒媽見人來講懵，佢就擺身擺勢便行程。轉到蔡家忙復命，和盤托出蔡爺聽。一件件，一樁樁，講來撩得這珠江，見說似乎多掃興，佢就默默無言惱在腸，唔想肖子之枚時在側，乘機心便起無良。叫語：「佢真無狀者，做乜將牛而以比都堂？」又話：「得中三元方議聘，唔通我妹非他則欠郎？算來何等之輕薄，真系叵耐謬妄且猖狂。」激起珠江心火發，就話：「此生輕佻果非常，想是倚他才與學，不然敢亂說言章！等我將佢秀才來問了，睇佢肋得乜風光？」便寫書投提學道，說生行止甚輕狂，惡少不堪來作養，請將名革出宮牆。
文宗得了都堂命，遵依敢不凜如霜？遂把白蓮名革了，衣巾唔許列儒行。生時聞得全唔論，獨有三學諸人惱莫當。各各不期皆聚集，聲言公憤蔡都堂。生見此時忙勸止，就話諸公聽我說端詳：「百年人事花三月，兩字『功名』夢一場。況且道廢道行原有命，安然順受乃為良。珠江將我衣巾革，天在冥冥有主張。算來豈系關他事？諸公何在為我傷？」三學見生如此說，就似冰消霧釋各渾忘。
辭親上京
生見眾人時解散，心中細細便思量，急叫一聲：「尋佢罷！等我對人來說我淒涼。」遂即轉返家裡去，將詞稟上老爹娘。說聲：「不肖孩兒子，今覺無顏轉故鄉。意欲束琴京上去，貪圖納監走科場。近因目下多閒散，敢稟爹娘就束裝。」鹿庵聞說多歡喜，就話：「此語分明合我腸。仔呀！凡事做人當努力，正好及時奮志繼書香。秀才問了何須丑，只要來科金榜把名揚。」接聲又見娘親道：「仔呀！詩書切勿就拋荒。古道書中有女顏如玉，書中有粟滿千倉。般般都系書中出，哩下由你京行便束裝。道途險阻須珍重，渡中行李要關防。」
生以雙親歡許可，遂齊行李轉書房。帶個蒼頭兼雪桂，就日辭親趕路忙。
聞報驚疑
生自訪嬌京上去，屈指行來兩月長。途中變異休多究，且談裴姐與何娘。
自到京來冬已暮，懷人都覺減容光。一朝起看階前雪，共倚梅花說白郎。映荷小姐長噓氣：「寒來何處不燃香？空系我地沉麝不燒銀鴨冷，為佢真箇好淒涼。昨閱《廣東鄉試錄》，做乜有人名字在中藏？估佢別後心情如落絮，耽愁唔去走科場。前日紅箋書一紙，上頭唔見有才郎。」麗姐聽言低著臉，就話：「想來一事更牽腸，佢既如今還未中，怕佢無面尋人到帝邦，又憂佢已來尋了，萬水千山道路長，披星戴月經唔慣，況且路途險阻亦須防。哩下萬慮千愁言不得，只系願人安穩任行藏。」話得映荷心愈亂，開聲又欲啟言章。
只見凌煙飛也似，跌來叫我兩嬌娘：「姐呀！你地大家虧命了，白生已死在鄱陽。」兩姐猝然聞此語，佢就齊齊嚇懵在花旁。心慌膽震唔聲得，空系放青兩眼睇實梅香。凌煙如實將言啟：「因婢先間出畫堂，適逢公子之枚到，共我老爺廳上說言章。佢話生自走科而不中，就為求親之事上京忙，恰值生來無幾日，此時佢亦即辭鄉。來謁丈人嚴宰相，所以白生之事佢知詳。話生恰至鄱陽地，就著賊人殺死在長江。」
嬌時聽得凌煙語，就似揩刀來割佢心腸。遂即跌返香閣內，雙雙氣死在牙床。感得侍婢取姜忙便救，二嬌然後轉回陽，醒來遂即哀哀哭。凌煙時又勸聲忙：「姐呀，大家莫咁高聲哭，免使夫人來問惡遮藏。」此時只得將聲忍，又見麗嬌含淚語何娘：「我地如今無主了，叫我此生何處問才郎？此生叫我如何好？叫我此生唔望有風光，此生叫我誰憐惜？只系一條死路是家鄉。」映姐聽言心愈苦，就話：「同心你尚未知詳，我地死時唔在說，只系虧佢青春為我忘，虧佢鍾情深似海，反遭強賊被刀傷。虧佢遊魂無倚靠，虧佢屍體暴露欠收藏，虧佢未曾如所願，更兼虧佢兩高堂。我地縱然身萬死，揩來猶未足相償。」
講罷大家偷又哭，佢就哭到寒雲破月光。是晚誰知天極冷，綺琴持起一爐香，喜氣匆匆從外入，叫聲兩姐聽端詳：「我正夫人房裡去，睇見錦爺拆閱一書章。話系李乜雲兄來會試，替生傳此到華堂。話生要到春三月，正得身閒到哩方。只得付來書一紙，聊慰多時掛肚腸。姐罷我實聽來唔記得，只話姑爺家內極平康。我想嗰個之枚真白水，做乜送唇送舌咁災殃！」二嬌聽得她言語，佢就合口齊聲致問忙：「果系見佢書與否？莫來大話惱人腸。」綺琴遂即回聲道：「真真唔系哄嬌娘，若話姐今唔信我，你畀錦爺一問便知詳。」
聽語麗娘心覺喜，映娘時又說聲忙：「我想白生若系無情事，做乜之枚敢亂說言章？其中必有緣和故，你話點能放下這條腸？」凌煙遂又開聲道：「之枚奸險甚非常，記得個回佢叫紅阿嫂，曾假傳詩到繡房。誰想著嬌來掃興，只怕佢心懷恨不能忘。哩下佢又到傳生遇賊，算來真怕佢無良。」入耳乍聞寒月下，飛來孤雁一聲揚，啼來驚得裴嬌姐，起望淒淒更斷腸。轉頭因對何嬌道：「人話音書能使雁傳將，白生目下凶和吉，真假難明實可傷。點得如今雁亦知人意，為寄多情紙半張。傳語直從東粵去，問人生死與存亡。討個消息歸報我，免得大家因佢咁淒涼。」